Март 17-ниң хүнүнде “Туваавтотранс” КХН бүдүрүлге черинге “Ютонг” маркалыг 12 чаа автобус немешкен.
Чаа автобустарны Тываның Чазааның болгаш Тываның Баштыңы Владислав Ховалыгның даалгазы-биле республиканың девискээринге пассажирлер аргыштырылгазын бүрүнү-биле чаартыр сорулгалыг сатканын орук-транспорт сайыдының оралакчызы Денис Хангай дыңнаткан.
“2022 чылда Тываның Баштыңы республиканың девискээринге пассажирлер аргыштырылгазын бүрүнү-биле чаартыр даалганы берген. Ук даалга-биле ол чылын Тывага ”Туваавтотранс” КХН-ниң бүдүрүлге чери тургустунган. Ол-ла чылын республика бюджеди-биле 25 “Ютонг” болгаш 10 "ПАЗ ВЕКТОР NEXT" маркалыг автобустарны саткан. Бөгүн база-ла ук даалганы күүседир сорулгалыг Тываның Баштыңының деткимчези-биле “Туваавтотранс” КХН-ниң девискээринде 20 автобустуң 12-зи чедип келген, а 8-и ам-даа орукта чоруп олурар” – деп, Денис Хангай чугаалаан.
Чонга аргыштырылга айтырыын чедимчелиг кылыры– Орук-транспорт комплекизиниң база бир кол сорулгаларының бирээзи.
Чаа келген автобустар тахограф, видеокамера болгаш оон-даа өске чолаачыга-даа, пассажирлерге-даа эргежок чугула дериг-херекселдер-биле чүмнеттинген. Бир автобусче барык 80 кижи кире бээр. Ооң мурнунда модельдиң автобустарынга деңнээрге, бо хевир агаар-бойдуска хора чедирбес дээрзин демдеглеп турар. Чаа автобустарны сатканы найысылал Кызылдың чурттакчы чонунуң аай-дедир аргыжылгазының шынары-даа экижиир, доктаамнарга үр үе дургузунда автобус манаар айтырыг шиитпирлеттинер дээрзинге идегел бар.
“Чаа автобустар келгенинге бистиң чолаачыларывыс аажок өөрүп турлар. Олар эптиг, хөй кижи кире бээр, кылаштаары багай кижилерге безин эптиг байдалды тургускан. Тускай белеткеп каан чаданы бадырыпкаш, кадыы кызыгаарлыг улуска автобусче киреринге белен болзун дээш, чогуур черинге тургускаш, колясканы быжыглааш, айыыл чок чоруктуң курун кыстырып каар. Ол ышкаш бичии уруглар колясказы салыр черни база аңгылап каан” – деп, “Тываавтотранстың” автоколонна даргазы Игорь Аракчаа чугаалаан.
Оон аңгыда, автобустарда изиг, соок агаар өйлээр системаны база кошкан. Чайгы изиг үеде автобус ишти сериин, а кыжын чылыг болур.
“Автобустарның амгы үениң негелделеринге дүүштүр бүгү талазы-биле дериттингени кончуг эки-дир. Кадыы кызыгаарлыг чонувус база автобустарга бергедээшкин чокка аргыжар аргалыг апаар. Оларга эптиг болзун дээш, пандустарны база кылып, тускай олуттарны аңгылаан”– деп, сайыттың оралакчызы Денис Хангай демдеглээн.
Автобустарны амгы үении-биле кылган, кончуг таарымчалыг. Олар найысылал Кызылдың девискээринге чонну аргыштырар. Пассажирлерге эптиг болзун дээш, бүгү-ле эптиг байдалдарны тургусканы өөрүнчүг.
“Амгы үеде документилерин кылдырар, бүрүткедир, Ространсхайгааралдың даңзызынче киирер ажылдар чоруп турар. Ол ышкаш чоннуң дилеглерин өөренип көрбүшаан, хоорайның кайы маршруттарынче киирерин сайгарып көрүп турар бис. Ооң соонда Кызылдың девискээринге чогуур маршруттарга чонну аргыштырып эгелей бээр” – деп, Денис Хангай дыңнаткан.
2022 чылда Тываның Баштыңының деткимчези-биле кожууннар болгаш хоорайлар аразынга пассажирлер аргыштырары-биле, “Тываавтотранска” 36 автобусту саткан. Бо чылын албан чериниң автопарыгынга 20 автобус немежип турары бо. Оларны чүгле Кызыл хоорайның девискээринге салыр.
Чыжыргана СААЯ.
Буян ООРЖАКТЫҢ тырттырган чуруктары.
“Шын” №21 2024 чылдың март 20
