Ярославль областа Красные Ткачи суурда кадыкшылга пансионадынга декабрь 5-тен 13-ке чедир бичии болгаш элээди оолдар, уруглар аразынга 2023 чылдың шыдыраага Россия Кубогунуң түңнел оюну болуп эрткен.
Аңаа Тываның төлээзи, Кызылдың Совет Эвилелиниң Маадыры Николай Макаренко аттыг 15 дугаар лицейиниң 7-ги клазында өөренип турар, 14 харлыг Арина Иргит кымга-даа уттурбайн, ап болгу дег 7 сандан 6 санны алгаш, бүзүрелдии-биле тиилээн.
Кызылдың Немелде өөредилге төвүнүң тренер-башкызы Сергей Түлүштүң удуртулгазы-биле шыдырааны өөренип, белеткенип турар Арина Иргит бо чылдың дургузунда бүгү россий деңнелдиң аңгы-аңгы маргылдааларынга чедиишкинниг киришкеш, Россия Кубогунуң түңнел оюннарынга киржир эргени чаалап алган.
Түңнел оюннарга бүгү Россиядан шилиттинген эң шыырак 8 элээди уруглар долгандырыг системазы-биле тиилекчилерни илереткен. Ол оюннарга Арина 5 удурланыкчызын арыг уткаш, 2 шыдыраачы-биле хайым болган.
Өөреникчизин мындыг улуг маргылдааже үдеп чораан ооң тренер башкызы Сергей Ыймажаповичиниң дамчытканы-биле, түңнелинде ийи дугаар чер алган Москвадан Олеся Федорова болгаш дөрт дугаар черни ээлээн Новосибирск облазындан Анна Брагина-биле салыглар чидиг байдалга эрткен. Ынчалза-даа Арина тиилелгеже кол кордакчыларның санынче кирип турган удурланыкчылары-биле деңге ойнааш, 0,5–0,5 кылдыр саннарын үлешкеннер. Өске салыгларын дөгерезин удуп алгаш, Тываның төлээзи Арина Иргит, ийи дугаар болган Олеся Федорованы чартык сан ажа берген.
Арина Иргит Россия Кубогун ам ийи дугаар чаалап ап турары бо. Ооң мурнунда, 2021 чылда, 13 хар чедир уруглар аразынга Россия Кубогунга база тиилээн болуп турар.
Россия Кубогу-биле катай Арина келир чылдың Делегей азы Азия чемпионадынга киржир эргени база чаалап алган.
Тываның шыдыраага тренер башкыларының аразында эң бедик көргүзүглерни чедип ап чоруур Сергей Түлүш өөреникчизи Арина Иргитти Россия Кубогун ойнап алырынга дузалажып, соңгаар үдеп чорда, ооң база бир өөреникчизи, Кызылдың Совет Эвилелиниң Маадыры Николай Макаренко аттыг 15 дугаар лицейиниң 10-гу клазында өөренип турар 17 харлыг Болат Бадыраа Тываның 2023 чылда «Тергиин шыдыраачызын» илередир шилилге маргылдаага тиилээш, ТР-ниң 60 маадыр аттыг Национал музейинге болур мөөрейге киржир эргени чаалап алган. Ооң удурланыкчызы, шилилге маргылдааның түңнел чадазынга 2 дугаар чер алган арга-дуржулгалыг шыдыраачы Экер-оол Манчын (Тере-Хөл) болур.
Тываның Спорт яамызының тургусканы «Тергиин шыдыраачы» деп хүндүлүг ат дээш мөөрейге ооң өөреникчизи Болат Бадыраа база тиилеп үнер деп, Сергей Ыймажапович Түлүш бүзүрелин илереткен.
Мерген КЫРГЫС.
Чуруктарны интернеттен алган.
«Шын» №96 2023 чылдың декабрь 16
