Күрүнениӊ арга-арыг комитединиӊ эрги даргазы элээн хээлилер алганы дээш судтадыр.
Эрге-дужаалдыг дарга хээлилерни өске-бир харылзаачы таварыштыр ап турган. РФ-тиӊ Кеземче хоойлузунуӊ 290-гы чүүлүнүӊ 5-ки кезээниӊ «в» пунктузунда кем-херекти үүлгеткенинге буруудаттырып турар. Республика прокурору кеземче херээниӊ буруудадыр түӊнелин бадылаан.
Күрүнениӊ арга-арыг комитединиӊ удуртукчузу 2016 чылдыӊ ноябрьдан тура 2018 чылдыӊ февральга чедир бир харылзаачы таварыштыр 515 муӊ рубль түӊнүг хээлини бир юридиктиг албан чериниӊ төлээзинден алган.
Тываныӊ арга-арыг фондузунуӊ девискээринден тоорук чыыр чер участогун бээр дугайында ажык аукцион чарлаан. Ооӊ түӊнели-биле чер участогун арендалап алган деп меге керээ чарып, чер участогун хөлезилеп алырынга дузалажып турган. Шак ол меге керээни Бойдус байлааныӊ ажыглалыныӊ талазы-биле Федералдыг хайгаарал албан черинге көргүскеш, тоорук үндүр сөөртүр чөпшээрел алыр сорулгалыг турган дээрзин истелге илереткен.
2015 биле 2016 чылдарныӊ сентябрь айда база-ла харылзаачы таварыштыр 200 муӊ рубль хээлини юридиктиг черлерниӊ төлээлеринден алгаш, меге керээлер берген. Оон аӊгыда, арга-эзим өрттерин өжүрер дээш, ужудуушкун кылыр деп меге чагыглар кииргеш, бир юридиктиг черниӊ директору-биле керээ чарып алган. Шак ол ажылдар күүсеттинген деп актыларга, ол улустуӊ акша шалыӊын ол-ла үезинде төлеп берген деп албан-херек бижиинге Күрүнениӊ арга-арыг комитединге чагыртыр албан чериниӊ удуртукчузунуӊ адын салдырып бээринге дузалаары дээш 240 муӊ рубль хээли алган. Акша-хөреӊгини 2017 чылдыӊ августан тура, 2018 чылдыӊ март айда харылзаачы таварыштыр ап турган.
Ук кем-херекти Россияныӊ Айыыл чок чорук албаныныӊ Тыва Республикада эргелели илереткен. Үүлгедикчиниӊ херээн Россияныӊ Истелге комитединиӊ ТР-де Истелге эргелели истээн.
Кеземче херээн алыр ужуру-биле сайгарып көрзүн дээш, Кызыл хоорайның судунче чорудупкан.
Ажыл-херээн хээли сунар арга-биле чогудуп турган кижилерниӊ үүлгедиин истеп турар, а хээли берген бир кижиниӊ херээн суд сайгарып турар.
С.А.ООРЖАК, Республика прокурорунуӊ улуг дузалакчызы.
Р. ДЕМЧИК очулдурган.
"Шын" №42 2023 чылдың июнь 10