Наадым байырлалынга тураскааткан аът чарыжынга киржип турган бичии оолдуӊ аар кемдээниниӊ уржуундан эмнелгеге чок апарганы-биле холбаштыр Тыва Республиканыӊ Баштыӊы Владислав Ховалыг ооӊ ада-иезинге, төрелдеринге ханы кажыыдалын илереткен.
«Көшкүн амыдыралдыг чон чораан болгаш, амдыгаа дээр көдээ иживисти салбайн, мал-маганывыс соондан кылаштап, тодуг-догаа чурттап чоруур өг-бүлелеривис кайы хөй. Ынчангаш ажы-төлдүң аът-биле холбаазы ханында, хей-аъдында деп бодаар мен. Бо удаада аът чарыжының үезинде назы четпээн, бичии аът мунукчузунуң айыыл-халапка таварышканының соонда, чок болганы канчаар-даа аажок улуг чидириг болду. Маргылдаага киржириниң дүрүмнерин, чурумнарын эде көөр ажылды черле эгелеп, киржикчилер чогуур белеткелди эрткен, эки деңнелдиг болур болза эки.
Чок болган оолдуң ада-иезинге, чоок болгаш төрээн кижилеринге ханы кажыыдалымны илереттим. Чазак-чагырга талазындан дузаны кадып, бо берге үеде деткиир бис» – деп, Владислав Ховалыг социал четкиде блогунга бижээн.
Маргылдаа үезинде айыыл чок дүрүмнерни сагыырыныӊ талазы-биле чарыш аъды мунар кижилерниӊ назы-харынга, идик-хевинге хамаарыштыр кезек негелделерни хоойлужудуп каан.
«Ындыг турбуже маргылдаага бичии оолдар кемдээр таварылгалар болуп турар. Бөгүнден эгелеп аът чарыжынга чүгле 18 хардан өрү назылыг спортчуларны чөпшээрээр деп шиитпирледим. Чогуур дужаал бөгүн үнүп келир. Аът чарыжын организастаарда, айыыл чок чоруктуӊ дүрүмнерин хандырбас болза, шак ындыг кызыгаарлаашкын ол хевээр турар. Тываныӊ спорт яамызынга болгаш Аът спортунуӊ федерациязынга аът мунукчуларын белеткээрин дагзып кагдым. Келир чылдан эгелеп, шак ындыг өөредилгелиг белеткелди эртип алган кижилерни маргылдаага киржирин чөпшээрээр. Көдээге өскен болгаш бичиизинден тура аът мунуп билир оолдарныӊ база квалификация алыры чугула» – деп, республиканыӊ удуртукчузу тайылбырлаан.
Аът чарыжы – спорттуӊ онза айыылдыг хевирлериниӊ бирээзи. Бичии оолдарныӊ кадыкшылын болгаш амы-тынын камгалаар ужурлуг бис дээрзин Владислав Ховалыг демдеглээн.
Р. Демчик белеткээн.