Чѳѳн-Хемчик кожууннуң Чадаана хоорайга тускай шериг операциязының киржикчилерин деткиири-биле база чаңчыл болган ХХХ-ги аът чарыжының ажыдыышкынынга тураскааткан республика чергелиг национал спортчу хевирлерниң (хүреш, ча адар, аът чарыжы) маргылдаалары болуп эртер.
Маргылдаа Чѳѳн-Хемчик кожууннуң Чадаана хоорайның чоогунда Бора-Булакка 2023 чылдың апрель 28-те 08.00 шакта эгелээр.
Аът чарыжынга сумуларның, тараачын болгаш фермер ажыл-агыйның, аът спорту-биле угланыышкынныг ажылдап чоруур хууда улус киржир. Аъттың ээлери чарышка киириштирер аъттарының паспорттарын эккээр.
Аныяк челер болгаш чыраа аъттарның чаржыр хемчээли 10 км, 4 харга чедир чүгүрүк аъттарның чаржыр хемчээли 15 км. болгаш киржикчи бүрүзүнүң дадывыры 3000 рубль.
4 хардан ѳрү чыраа болгаш челер аъттарны чарыштырар хемчээли 15 км, 4 хардан ѳрү чүгүрүк аъттарның чаржыр хемчээли 30 км болгаш киржикчи бүрүзүнүң дадывыры 5000 рубль.
Маргылдаадан кирген дадывыр акша-хѳреңгини ТШО-да киржип турар шериг албан-хүлээлгелиглерге, эки турачыларга деткимче кылдыр чорудар.
Национал оюннарның дүрүмү ёзугаар аът мунукчузу спортчу хеп биле камгалал бѳрттү кеткен турар ужурлуг. Аът мунукчузунуң хар-назыны 14 хардан ѳрү турар (2008 ч.т. болгаш оон улуг). Назы четпээн аът мунукчузунуң хоойлу ёзугаар тѳлээлекчизи бижимел хевирге чѳпшээрелди берген турар. Аът мунукчулары дараазында бижик-документилерлиг болур:
– Россия Федерациязының хамаатызының паспорду;
– маргылдаа болуп турар хүнде 14 хар четкен аът мунукчузу РФ-тиң хамаатызының паспортун ап четтикпээн таварылгада, тѳрүттүнген дугайында херечилелди, хѳрек чуруктуг шынзылганы, школа директорунуң шынзытканы херечилел бижикти (№ 2 капсырылга, карточка) эккээр;
маргылдаа болур хүнде 18 хар четпээн аът мунукчузунуң амы-тыны, айыыл чок чоруун хүлээнген дугайында кожууннуң болгаш сумунуң чагырыкчыларының шынзытканы аът ээзиниң билдириишкини турар;
– маргылдааның киржикчизиниң амы-тынын, кадыын озал-ондактыг таварылгалардан камгалаан камгадылга бижиктиң боду (оригинал);
– тускай спортчу хеп болгаш камгалал бѳрт;
– назы четпээн аът мунукчузунуң амы-тыны, айыыл чок чоруу дээш аъттың ээзи долу харыысалганы хүлээнир.
Үстүнде айыттынган негелделерни күүсетпээн киржикчилерни мандат комиссиязы маргылдааже киирбес. Аът мунукчузу финишке камгалал бѳрт чок кирип келген таварылгада, ооң түңнелин күш чок кылдыр санаар.
2023 чылдың апрель 27-де 08.00–18.00 шактарда киржикчилерни бүрүткээр. Комиссияның бүрүткел ажылы 2023 чылдың апрель 27-де 18.00 шакта хагдынар. Маргылдаа болур хүнде бүрүткел ажылын чорутпас. Адрези: Чадаана хоорай, Ленин кудумчузу, 29 дугаарлыг бажың.
1. 10 км хемчээлге аныяк чыраа болгаш челер аъттар 08.00 шакта.
2. 15 км хемчээлге 4 хардан ѳрү чыраа аъттар 09.00 шакта.
3. 15 км хемчээлге 4 хардан ѳрү челер аъттар 10.00 шакта.
4. 15 км хемчээлге 4 харга чедир чүгүрүк аъттар 11.00 шакта.
5. 30 км хемчээлге 4 хардан ѳрү чүгүрүк аъттар 12.00 шакта.
14.00 шакта тиилекчилерни болгаш шаңналче киргеннерни шаңнаар.
Эр улус аразынга “Баг адар хевирге” национал ча адар маргылдаа болуп эртер
2023 чылдың апрель 27-де 08.00–16.00 шактарда ча адар маргылдааның киржикчилерин бүрүткээр. Маргылдаа болур хүнде бүрүткел ажылын чорутпас.
Адрези: Чадаана хоорай, Ленин кудумчузу, 29 дугаарлыг бажың.
Маргылдаа 2023 чылдың апрель 28-те 08.00 шакта Бора-Булак ховузунга болур.
Кол шииткекчи – Куулар Владимир Хуналдаевич.
Кол секретарь – Дамбыра Алдын-Херел Орланович.
Республиканың эң-не шилиндек мѳгелериниң аразынга тыва хүреш маргылдаазы
2023 чылдың апрель 27-де 08.00—16.00 шактарда хүреш маргылдаазының киржикчилерин бүрүткээр. Адрези: Чадаана хоорай, Ленин кудумчузу, 29 дугаарлыг бажың. Комиссияның бүрүткел ажылы 2023 чылдың апрель 27-де 16.00 шакка чедер.
Хүреш маргылдаазы 2023 чылдың апрель 28-те 12.00 шакта Чадаана аттыг стадионга болуп эртер.
"Шын" №29 2023 чылдың апрель 22
