Россияныӊ Гнесиннер аттыг хөгжүм академиязыныӊ профессору республиканыӊ Ростислав Кенденбиль аттыг уран чүүл школазынга аалдап кээп чораан.
Худолей Виктор Романович - оркестр дирижёрларын өөредир кафедраныӊ профессору, уран чүүл эртемнериниӊ кандидады, Россияныӊ дээди школазыныӊ Алдарлыг ажылдакчызы.
Уран чүүлге салым-чаяанныг уруглар школазыныӊ директору Николай Дамбаа хүндүлүг аалчыга школа-интернатты таныштырып көргүскен.
Өөредилге албан чериниӊ чогаадыкчы коллективи үш аӊгы оркестрлиг. Орус улустуӊ хөгжүм оркестирин Евгения Моӊгуш, үрер хөгжүм оркестирин Азиана Ондар, а «Ойна» соктаар хөгжүм ансамбилин Россияныӊ болгаш Тываныӊ Культуразыныӊ Алдарлыг ажылдакчызы Валерий Дыртый-оолович Ондар удуртуп турар.
Школачылар башкыларыныӊ удуртулгазы-биле хөгжүм концертин бараалгаткан. Россияныӊ, делегейниӊ хөгжүмчүлеринге билдингир композитор, дирижер, аранжировщик, В. М. Халилов аттыг делегей чергелиг дирижёрлар II конкурурузунуӊ уран чүүл удуртукчузу өөреникчилерниӊ ойнап турарын үнелеп, мактаан.
Р.Демчик белеткээн.
