Улуг уйгу
Эрте турган эрес оолга
Эзерлиг аът дужар дижир.
Улуг уйгу ээзи болуп,
Ундаралга алыспайн чор.
Улуг уйгу таалал болбас,
Улуг уйгу — алдар бербес,
Улуг уйгу — атка багай,
Утпайн сактып чору, оглум.
Улуг хырын
Улуг хырын — укка багай,
Улуг хырын — шоотка кирер,
Улуг хырын — тодуу эвес,
Утпайн сактып чору, оглум.
Улуг чалгаа
Кандыг-даа иш кылганыңда,
Кара, ак деп ылгай көрбе.
Аар, чиик деп ажыл турбас –
Амыдырал бадыткап каан.
Улуг тура
Болур-болбас чүве-ле дээш,
Бодуң адың хүлге борап,
Отка каапкан сиир ышкаш,
Ойда-кайда чаңнай бербе.
Улуг тура — ужуруп боор,
Улуг тура — чонга сыңмас,
Улуг тура — эш-өөр тыртпас,
Утпайн сактып чору, оглум.
Михаил Дуюнгар
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn