Улуг-Хем кожууннуң Шагаан-Арыг хоорайда туризм төвүнге Улуг-Хем, Каа-Хем болгаш Чаа-Хөл башкыларының аразынга «Авамның хуулгаазын аптаразы» Ажык эжик хүнү февраль 7-де болуп эрткен.
Хемчегниң хүн чурумун таарымчалыг кылдыр тургускан болгаш, илеткелчи башкылар боттарының үезин шын сагып, кол кезээнде кичээл эрттиреринге таарымчалыг байдалдарның өөредилгезин уруглар албан черлериниң эргелекчилеринге, тыва дылдың, уран чүүлдүң башкыларынга таныштырган.
Туризм төвүнүң удуртукчузу Чойганмаа Даваа хемчегни удуртуп эрттирген. Шуулган-өөредилгениң киржикчи башкылары Валерия Монгуштуң «Улуг-Хем кожууннуң онзагай черлериниң дугайында», Мира Кыргыстың «Салгал дамчаан тыва эдилелдер», Чечеймаа Кыргыстың «Тыва өг — октаргай», Арыскан школа музейиниң удуртукчузу, Ийи-Тал аграрлыг школаның кижизидикчи башкызы Инга Сүрүн-оолдуң «Кырган-авам алдын аптаразы», Шагаан-Арыгның 4 дугаар «Челээш» уруглар садының кижизидикчи башкызы Римма Норбунуң «Тыва сыртыктарның 9 аңгы хевири», Арыг-Үзүүнүң культура төвүнүң уран чүүл удуртукчузу Саяна Тулуштуң «Угуң-дөзүң кайыын дизе, ааткыыштыг кавайымда», Арыг-Үзүү суурнуң «Теремок» уруглар садының кижизидикчи башкызы Ираида Кыртынмайның «Аът чарыштырары» болгаш туризм төвүнүң удуртукчузу Чойганмаа Давааның «Амгы үеде өлчей ырының чаш уругнуң аажы-чаңын кижизидеринге болгаш кижи болуп хевирлеттинеринге салдары» деп көргүзүглүг илеткелдерин башкылар улуг сонуургал-биле дыңнап, көргүзүг херекселдери-биле таныжып, арга-сүмезин солушканнар.
«Өөредиглиг шуулганның ажыл-ижи бичии уругларга байырлалдар болгаш кичээлдер эрттиреринге таарымчалыг» — деп, башкылар түңнээн. Шак мындыг өөредиглиг хемчеглерни кожууннар аразынга эрттирери кижизидикчи башкыларның арга-дуржулгазын бедидип, школа назыны четпээн уругларның дыл-домаан сайзырадырынга, төрээн тыва дылывысты болбаазырадып, байыдарынга ужур-дузалыг деп, олар саналдааннар.
Шуулганга Национал школа хөгжүдер институттуң методист башкызы Альбина Монгуш киржип, башкыларның белеткелин бедик шынарлыг деп демдеглээн.
Өөредиглиг шуулган дараазында Каа-Хем кожууннуң Кундустуг суурнуң «Челээш» уруглар садынга февраль 28-те эртер.
Бистиң корр.
“Шын” №5 2025 чылдың февраль 13
