Декабрь 30-де ТР-ниң шериг комиссариадының тургустунганындан бээр 79 дугаар чылын демдеглээн.
ТР-ниң шериг комиссары Д. Артынаның 2023 чылдың декабрь 20-де 317 дугаар дужаалы-биле Чаа-Хөл кожууннуң шериг-учёт ажылдакчызы Аляна Чигденни хөй чылдарда ак сеткилдиг ажылы дээш “РФ-тиң Камгалал яамызының Шериг комиссариаттарының 105 чылы” деп медалы-биле шаңнаан.
Аляна Чигден – ТР-ниң эң тергиин шериг-учёт ажылдакчыларының бирээзи.
Чаа-Хөл кожуунда шупту 4 шериг-учёт ажылдакчызы ажылдап турар. Аляна Биче- ооловна 2009 чылдың март 23-тен тура ажылдааш, эң-не үр ажылдап турарларның санынче кирген. Ол Бурят Республиканың В. Филиппов аттыг күрүнениң көдээ ажыл-агый академиязының “Финанс болгаш кредит” адырын дооскан. Улуг-Хем кожууннуң төвү Шагаан-Арыг хоорайга төрүттүнгеш, бүгү назынында Чаа-Хөл кожуунда чурттап чоруур. Ынчангаш ол бодунуң 4 муң хире чаңгыс чер чурттугларын, ооң иштинде 800 ажыг учётта турар кижилерин саазындан эвес, а арыннарын беш салаа дег билир.
“Чылдың-на Чаа-Хөл кожуундан шериг албанын эрттирери-биле барык 30 хире кижи чоруур. Бистиң суурнуң оолдары шериг албанынче күзелдии-биле чоруп турарлар. Школаларга, ада-ие хуралдарынга сөс ап, өөредилге черлеринге оолдарга үргүлчү ужуражып барып турар болгаш, оларның кадыкшылының дугайында шуптузун билир мен. Ынчангаш бүдүн суурнуң өг-бүлелери шупту мени таныыр” – деп, Аляна Биче-ооловна бодунуң ажыл-агыйының дугайында улуг чоргаарал-биле чугаалаан.
«Кадыкшылының аайы-биле шериг албаны эртпейн баар оолдар бар. Чижээ, бичии тургаш кемдээшкин алган азы гастрит-биле аарып турган таварылгада шериг албанын эртери болдунмас. Ада-иелери эскербээн, оолдар боттары-даа аарып турарын чугаалаваан болур. Шериг комиссиязының үезинде эмчи шинчилгезин эртип турда, илереттинип келир. Деңзизи четпес азы диштери багай оолдарның өг-бүлелери-биле ажылдап эгелээш, чартык чыл болгаш дараазында кыйгыртылгаже белеткей бээр бис” – деп, хоочун шериг комиссариадының ажылдакчызы тайылбырлаан.
ТШО эгелээнинден бээр ажылдаары элээн берге апарган. Чүге дээрге оларның ажылынче чемелээшкиннер болгаш буруудадыышкыннар хөйү-биле кээп эгелээнин шериг-учёт ажылдакчызы чугаалаан: “Ажыл ындыг болганда, дөмей-ле бердинип ажылдаар апаар. Шеригже келдирткен оодарның ада-иелеринге психолог-даа, социал ажылдакчы-даа, чаңгыс чер чурттуу-даа болур мен”.
Аляна Чигден боду 4 ажы-төлдүң хүндүткелдиг авазы. Ооң улуг оглу төрээн чуртунуң камгалакчызы болган. Шериг албанын Мурманск облазының шериг-далай флодунга эрттиргеш, аңаа-ла керээ ёзугаар ажылдап арткан. ТШО-га киришкеш, дайынчы хөделиишкиннер хоочуну болган.
“Ынчангаш шеригже келдиртип турар оолдарга авазы дег хамаарылгалыг мен. Чүге дээрге оолдарны шеригже үдеп тургаш, ак орукту күзеп, чагыг-сүмени бээр мен. Шериг албанын эрттиргеш келирге, уткуп, төрээн чер-чуртунга чанып келгенин база демдеглээр мен” – деп, ол чугаалаан.
Тыва Республиканың шериг комиссариады.
Чуруктарны шериг комиссариадының архивинден алган.
«Шын» №5 2024 чылдың январь 24
