Тывада агаарның изии 37 градус ашкан. Ынчангаш республикада арга-арыг өрттери-биле байдал нарыыдаан. Бо хүнде республика девискээринде 146 гектар шөлде 10 өрт хып турар.
Тываның Баштыңы Владислав Ховалыг республикада өрттерни өжүреринче авиацияны хаара тудар сорулга-биле Россияның Камгалал база Онза байдал яамыларынче дилегни киирер деп шиитпирлээнин дыңнаткан.
«Десантчыларны айыылдан чайладыры-биле баш бурунгаар эки хынаар. Чер-черде эрге-чагырга черлери ОБЯ КЭ, ХК база ОБ албаны болгаш чурттакчы чон-биле доктаамал харылзааны тудар. Чурттакчылыг черлерге өрт айыылын болдурбас» — деп, регионнуң удуртукчузу сагындырган.
Хамааты камгалал болгаш онза байдалдар албаны эрткен хонукта беш арга-арыг өрттери өөскүп үнгенин дыңнаткан. Чеди-Хөл кожууннуң Элегес арга-арыг, Каа-Хем кожууннуң Бүрен-Хем арга-арыг, Тожунуң Хамсара арга-арыг девискээрлеринде хып үнген өрттерни өжүрген.
Тываның Чазааның доктаалы-биле республикада өртке удур онза чурум июль 8-ке чедир үргүлчүлээрин сагындыраал. Баш бурунгаар медээлерни көрүп, өрт айыыл-халавын болдурбазы-биле ол чурумну узадыры чайлаш чок. Арга-арыг девискээрлеринде патрульдаашкын ажылын шыңгыыраткан, девискээр органнары “кезээде белен” чурумда ажылдап турар, өртке удур байдал Тываның Баштыңының бодунуң хыналдазында.
ТР-ниң Чазааның парлалга албан
“Шын” №48 2024 чылдың июнь 29
![](https://sun4-20.userapi.com/impg/tSHczCa3ggs1Y46X5Rh9Lw3eMulCpjDPWV12Eg/O3u7BfIz680.jpg?quality=95&as=32x21,48x32,72x48,108x72,160x107,240x160,360x240,480x320,540x360,640x426,720x480,1080x720,1280x853&sign=e8794094dd109359169293b7d3d04e4d&from=bu&u=6_X61aKXU0cxy9PL2H4Y7yMFeE9tKKeE-mfwt49_TUU&cs=807x538)
![](https://sun4-18.userapi.com/impg/eXja1FiVtdTc4BBwlls_fhi4P3Y2fLByaNmJaw/SDxZPZY6kuY.jpg?quality=95&as=32x25,48x38,72x57,108x85,160x126,240x190,360x285,480x379,540x427,640x506,720x569,1080x854,1280x1012,1440x1138,1600x1265&sign=9ce76f196192cbcdb94d88e7c9265508&from=bu&u=xQakjv4LcPK64tbXnD1su03jPdCDQv30mHrJKIlm6wY&cs=807x638)