Чолаачылар болгаш кондукторлар улуг улустуң эдертилгези чокка чоруур 16 хар четпээн уругларны аргыжылга транспортундан күш-биле дүжүрерин хоруп турар хоойлу 2021 чылдың март 7-ден эгелеп күштүг болуп кирген. Федералдыг хоойлунуң хажыдылгазы багай түңнелдиг болуп дооступ, буруулуг кижилерни кеземчеге онаап болур дээрзин мэрияның удуртулгазы сагындырып турар. Соок дүшкен үелерде уругларны кудумчуга чааскаандырзын каары оларның амы-тынынга болгаш кадыкшылынга айыылдыг.
Күрүне Думазының албан ёзузунуң сайтызында айтып турары-биле алырга, ындыг аажылал дээш чолаачыга беш муң рубльдиң торгаалы көрдүнген. Албан-дужаал эдилээннерге, өскээр чугаалаарга, кондукторларга азы контролерларга — 20 муңдан 30 муң рубль чедир. Ынчалзажок уругну улуг кижи эдертип алган чоруур болгаш аргыжылга өртээн төлевес чүве болза, чоокку доктаамга оларны дөмей-ле дүжүрер.
Ындыг чергелиг таварылгаларга душкан болза, автобустуң дугаарын сактып алгаш, Ленин кудумчузу, 32 дугаарлыг бажың, каб. 105, тел. 3-31-06 адресче билдириишкинден бижип каарын Кызыл хоорайның мэриязы сүмелеп турар. Бо чүүл моон соңгаар ындыг таварылгаларны болдурбазынга дузалаар. Оон аңгыда, назы четпээннер дөмей-ле аргыжылга өртээн төлээр ужурлуг дээрзин мэрия сагындырып турар.
А. ХЕРТЕК белеткээн.
Чурукту интернеттен алган.
«Шын» №93 2023 чылдың декабрь 6
