Эрткен неделяда «Кызыл-Мажалык — Аяңгаты» автомобиль оруунда Улуг-Аяңгаты хемни кежир туттунган чаа көвүрүгнүң байырлыг ажыдыышкыны Барыын-Хемчик кожуунга онзагай болуушкун болган. Орук объектизиниң чаартылгазын «Айыыл чок шынарлыг оруктар» национал төлевилелдиң күүселдези-биле туткан. Регионнуң Баштыңы Владислав Ховалыгның даалгазы-биле 2020 чылда үерге алыскан көвүрүгнү национал төлевилелдиң кыска үе дургузунда катап тургузар ужурлуг объектилериниң даңзызынче киирген.
2020 чылда часкы үер үезинде үрелген көвүрүг Барыын-Хемчик кожууннуң Аяңгаты сумузунче транспорт оруун дуглаан. Владислав Ховалыг Барыын-Хемчик кожуунга сургакчылаашкын үезинде тус чер чурттакчыларының аргыжылгазының берге байдалын көрген. ТР-ниң Орук-транспорт яамызынга үер соонда катап тургузар ужурлуг оруктар даңзызынче киирерин дааскан.
«Кызыл-Мажалык — Аяңгаты» оруунда көвүрүг Өвүр болгаш Мөңгүн-Тайга кожууннарда өске-даа аварийлиг айыылдыг көвүрүглер-биле бир дөмей национал төлевилелдиң акшаландырыышкыны-биле септеттинер ужурлуг деп шиитпирлээн. Аяңгаты, Чоза база Барлык хемнерни кежир көвүрүглерни тударын база шиитпирлээн турган.
Көвүрүглерни катап тургузар ажылдарны «Восток» КХН 2022 чылдың чазынында чорудуп эгелээн. Орукчулар көвүрүглерниң тавактарын салгаш, моондак херимнерни болгаш орук демдектерин тургускан.
Ак сеткилдиг ажылы дээш орукчуларга, ол ышкаш амыдыралга чугула орук объектизин катап тургусканы дээш Тываның Баштыңынга болгаш Чазакка чаа көвүрүгнүң ажыдыышкынының үезинде суурнуң чурттакчылары өөрүп четтиргенин илереткен.
2019-2020 чылдарда часкы үер-чайык үезинде, суггур чаъстаашкын соонда, дагларга хар эрээш, суглар улгаткаш, Тываның орук четкизинге улуг когаралды чедирген. Ынчан Орук-транспорт яамызының медээзи езугаар, ниитизи-биле 19 км автоорук база 32 көвүрүг үрелген.
Амгы үеде ынчангы үрелген автооруктарның болгаш көвүрүглерниң хөй кезии бүрүнү-биле катап тургустунган. Чоза хемни кежир көвүрүг эрткен чылын чаарттынган, бо чылын «Хандагайты — Мугур-Аксы» автоорукта Барлык хемде көвүрүг тудуу эгелээн.
ТР-ниң Чазааның медээзинден.