Чоокта чаа Таңды кожууннуң Бай-Хаак суурнуң ортумак школазынга Тыва Республиканың болгаш Таңды кожууннуң ховар салым-чаяанныг, чараш кызы Алдынай Бүрбүнүң чырык адынга тураскааткан республика чергелиг «Аялга частып келир» деп ыры мөөрейи болуп эрткен. Аңаа 40 ажыг күзелдиг ыраажылар Таңды, Чеди-Хөл, Тес-Хем, Сүт-Хөл, Каа-Хем, Бии-Хем, Кызыл кожууннардан болгаш Кызыл хоорайдан келген.
Мөөрейниң киржикчилерин назы-хар аайы-биле ийи бөлүкке чарган: 10 хардан 17 харга чедир база 18 хардан өрү назылыглар. Мөөрейжи бүрүзү шииткекчилер бөлүүнге ийи аңгы ырларын күүседип бараалгаткан.
Мөөрейниң түңнелинде бичии бөлүктүң Гран-при шаңналынга Таңдының Межегейден Согаа Мөңгүн-Ай төлептиг болган.
Лауреаттар: Сүлде Самбуу (Бии-Хемниң Сесерлиг), Эртине Шаравии (Таңды кожууннуң Бай-Хаак), Роксана Балан-оол (Таңдының Дүрген).
Дипломантылар: Субудай Севекпит (Таңдының Успенка), Аяру Монгуш (Таңдының Арыг-Бажы), Кайгал-Кан Дамряк (Кызыл).
Тускай шаңналдар: «Эстрада ырызының чырык күүселдези» – Каролина Вершинина (Бай-Хаак), "Терең өттүр көөр " — Тумен-Маадыр Бүрбү (Бай-Хаак), «Чырык болгаш сагыш-сеткилди оттурар күүселде» — Сугдер Монгуш (Бай-Хаак); «Уран-чечен чорук» — Даниэла Монгуш (Чеди-Хөл), "Улусчу ыры күүселдези" — Яна Сарыглар (Бай-Хаак), «Чогаадыкчы көрүш» — Орлана Оюн (Дүрген).
18 хардан өрү бөлүкке дээди шаңналды Кызыл кожуундан Рулатэ Монгуш алган.
Лауреаттар: Таңды кожуундан Айлана Оюн, Кызыл хоорайдан Даң-Хая Шириижик, Каа-Хем кожуундан – Доңгак Белек.
Дипломантылар: Каа-Хем кожуундан Чодураа Салчак, Дүрген суурдан Станислав Чүлдүм, Бай-Хаак суурдан Аялга Сарыглар.
Мөөрейниң шупту киржикчилеринге тураскаалдыг медальдарны, кубоктарны, үнелиг белектерни тывыскан. Уруглар «Идепкейлиг киржилге» деп номинацияга акша деткимчезин алган.
Мөөрей бедик деңнелге эрткен. Алдынайның ада-иези, төрелдери мөөрейни организастаарынга, эрттиреринге дузалашкан, кижи бүрүзүнге өөрүп четтиргенин илереткеннер. Ада-иези уруунуң адын мөңгежидип чоруур эки-дир.
«Сактыышкын мөөрейи» өөрүнчүг болган. Ырылар күүсеттинип, дыштанылга үезинде кайгамчыктыг Алдынайның күүселделериниң видеоларын кижи бүрүзү көрген.
Алдынай Бүрбү чуртталгазының кыска үезинде бистиң Таңды кожуунувуска өөренип, Россияның девискээрлеринге концерттерин бараалгадып, чоннуң сонуургалдарын чедип ап чораанын хөй шаңналдары бадыткап турар. Алдынайга «Таңды кожууннуң алдарлыг артизи» деп атты тыпсыр болза, төлептиг деп бодаар-дыр мен.
/ Сергей ТЫРТЫК.
Чурукту авторнуң архивинден алган.
“Шын” №19 2026 чылдың май 21
"Шын" солуннуң МАХ-каналынга каттыжыңар max.ru/join/egenQ...