Март 18-те уруглар чогаалчызы Леонид Борандаевич Чадамба 105 харлаан. Аңаа тураскаадып, школачылар аразынга аянныг номчулга мөөрейин эрттирген.
Ук мөөрейни эрттиреринге чогаалчының өг-бүлезиниң кежигүннери: уруу Айлана Чадамба, уйнуу Леонид Чадамба, уйнуунуң оглу Илья Чадамба база өске-даа төрел-дөргүлү организастап эрттирген. Мөөрейниң жюри кежигүннери Айлана Чадамба, Леонид Чадамба, арга-дуржулгалыг артист Арсен Сюрюн, Өөредилге болгаш культура яамыларының, К. Чуковский аттыг уругларның ном саңының төлээлери болганнар.
Уруг бүрүзүнүң белеткели канчаар-даа аажок шыырак болган. Оларның аянныг номчулгазын арга-дуржулгалыг артистер-биле-даа деңнеп болур. Ынчангаш баштайгы 3 тиилекчини илередири, амыр эвес ажыл болган. Үшкү черге Кызыл кожууннуң төлээзи Асель Күжүгет төлептиг болуп, диплом болгаш 5 муң рубльдиң сертификады-биле шаңнаткан. 2-ги черни Бай-Тайга кожуундан Аржаан Күжүгет чаалап алгаш, 7 муң рубльдиң сертификадын алган. Сүт-Хөл кожууннуң төлээзи Лилия Ооржак мөөрейге тиилээш, 10 муң рубльдиң сертификадын алыр аас-кежиктиг болган. Мөөрейниң арткан киржикчилери киришкен дугайында сертификаттарны болгаш чогаалчы Леонид Чадамбаның өг-бүлезинден чигирзиг белектерни, сактыышкын болуп артар суй белектерни алганнар.
Аянныг номчулганы сайзырадып, мындыг мөөрейлерни ам-даа хөйнү эрттирер болза, Россия чергелиг чадаже-даа үнүп болур дээрзин Айлана Чадамба демдеглээн. Ырылар мөөрейинге бодаарга, шүлүк жанрынга мөөрейлер эвээш эртип турарын барымдаалап, шаңнал-макталдарны төлептиг кылдыр тывыскан.
Киржикчилер саны база аажок хөй болган. Кожууннарга болгаш найысылал Кызылга киришкен өөреникчилер саны барык 100 четкен. А республика чергелиг чадазынга эң-не тергиин 20 уруг киришкен. Ол ышкаш чогаалчының 105 харлаанын ооң төрүттүнген чери Тожу кожуунда база байырлап эрттирип, ооң шүлүктерин номчаан.
“Аянныг номчулганы бүгү чон сагынганы көскү-дүр. Кижи бүрүзү шын болгаш аянныг чугааланып өөренип алыксап турар. Номчукчу кижи ону аянныг номчувушаан, дыңнакчының сагыш-сеткилин оттур чугаалаптары кончуг нарын ажыл. 105 харлаанын шак мындыг байдалда демдеглеп эрттирип турарывысты, ачам өрү дээрде өөрүп көрүп олур боор” – деп, Айлана Чадамба демдеглээн.
“Ававыс “Шын” солунга база ажылдап турган. Дуңмам Лена ынаар баарынга дыка ынак турган. “Бичии Лена” деп шүлүктү ол дуңмамга тураскаадып бижип каан. Ол, шынап-ла, бичиизинде шүлүкте канчаар бижип каан, шак ындыг бүгү талазы-биле сайзыраңгай уруг турган” – деп демдеглээш, “Шын” солуннуң коллективинге ол байырын чедирген.
/ Чыжыргана СААЯ.
