Россияның социал фондузунуң Тыва Республикада салбыры азыралында назы четпээн азы студент ажы-төлдүг 10 муң ажыг чурттакчыларының пенсиязынга өстүрген төлевирни төлеп турар.
Бо деткимчени назы четпээн азы 23 харга чедир очно өөренип турар студент ажы-төлдүг, назы-харының болгаш кадыының аайы-биле камгаладылга пенсиязын ап турар кижилер алыр эргелиг. Өг-бүледе элээн каш ажы-төл бар болза, немелдени уруг бүрүзүнге санаар. Ынчалза-даа ону үштен көвүдетпес ужурлуг. Ооң-биле чергелештир чаңгыс ол-ла уруг дээш ада-иезиниң иелдирзиниң пенсиязын өстүрер.
Немелде төлевирни ажылдап-даа, ажылдавайн-даа турар пенсия алыкчыларынга доктаадыр. Өзүлдениң хемчээли доктаамал төлевирниң 1/3 кезии болур. 2025 чылда Тывада назы-хар аайы-биле камгаладылга пенсиязын ап турар кижилерге бир кижиге хамаарыштыр 4156,92 рубль, а Тожу, Мөңгүн-Тайга кожууннарда база Тере-Хөл кожууннуң Шынаа сумузунда ол 4453,85 рубль.
«Төлевирни уругнуң өөренип турарынче көрбейн, 18 харлыынга чедир бээр. Уруг 18 хар чеде бээрге, 23 харлыынга чедир хүндүскү салбырга өөренип турар болза, чүгле ол үезинде төлээр. Бир эвес студент албан ёзугаар орулгалыг апаар азы бот-өөредилгеже, ырактан азы кежээки өөредилгеже шилчий бээр азы шуут өөредилгезин кааптар болза, төлевирни соксадыр. Ол дугайында Россияның социал фондузунуң Тыва Республикада салбырының клиентилер албанынга дүрген дыңнадыр херек. Бир эвес студент өөренип турар үезинде шөлээ аптар болза, ада-иезиниң пенсиязынга немелде төлевир уламчылаар» – деп, эргелекчи Часкал Дараа тайылбырлаан.
Өстүрген төлевирни пенсияны баштай тыпсып турда-ла, доктаадып каар. Бир эвес пенсияны көвүдедир эрге ооң соонда тыптып келген болза, ынчан Россияның социал фондузунуң Тыва Республикада салбырының клиент албанынче азы Күрүне ачы-дузазының порталынче билдириишкинни киирер. Бир эвес уруг 2024 чылдың январь 1-ниң соонда төрүттүнген болза, немелде төлевирни баш бурунгаар доктаадыр.
Социал болгаш пенсия камгалалынга хамаарышкан айтырыгларны чаңгыс аай харылзажыр төптүң дараазында телефон дугаарынче долгааш, айтырып болурун сагындырып турар:
8 800 100 00 01
Россияның социал фондузунуң ТР-де салбырының медээзинден алган.
Чурукту интернет четкизинден хоолгалаан.
2025 чылдың август 28 “Шын” №33