Найысылал Кызылга шыдыраа ойнаар шөлдү Россияның шериг-төөгү ниитилелиниң дектимчези-биле ажыткан. Ону найысылалдың төвүнде «Кызыл коъш» мемориалдыг тураскаал чанынга тургускан. Бүгү чурта ийи дугаар мындыг Шыдыраа клуву ажыттынып турары бо. Бир дугаарын июнь айда Москва хоорайга ажыткан.
Клубтуң байырлыг ажыдыышкынында ТР-ниң Чазак Даргазының оралакчызы Орлан Сарыглар, Россияның шериг-төөгү ниитилелиниң регионалдыг департаментизиниң директору Аяна Шойгу, ТР-ниң культура сайыды Виктор Чигжит, Дээди Хуралдың (парламентиниң) депутады Аяна Монгуш база Тыва Республиканың Шыдыраа федерациязының президентизи Ренат Ооржак олар байыр чедирип сөс алганнар.
«Шыдыраа клувунуң ажыдыышкыны — Тывага шыдырааның хөгжүлдезинге үнелиг салыышкын-дыр. Бисте республика болгаш бүгү-россия чергелиг маргылдааларга эки түңнелдерни көргүзүп турар салым-чаяанныг уруглар хөй» — деп, ТР-ниң Дээди Хуралының депутады, «Чаңгыс демниг Россия» политиктиг партияның кежигүнү Аяна Монгуш демдеглээн.
Байырлыг ажыдыышкын соонда республиканың элээди уруглар аразынга «блиц-турнир» — дүрген шыдыраа маргыдаазын организастаан.
Бистиң корр.
"Шын" №58 2024 чылдың август 3
