Чаа чыл байырлалының дыштаныр хүннеринде Тываның социал адыры, одалга-энергетика бүдүрүлгелери база чуртталга-коммунал ажыл-агыйы чаңчылчаан чурум езугаар ажылдап турар. Тываның Баштыңы Владислав Ховалыгның даалгазы-биле дүрген хөделир албан черлери ажылын күштелдирген. Эзирик чолаачылар илередип, тудары-биле оруктарга хүн бүрүде патруль ажылдары чоруп турар. Ол ышкаш транспортка таарымчалыг байдалды тургузары-биле орук албан чериниң ажылын база күштелдирген. Медицина албан черлеринде эмчилерге дежурныйлаашкынны организастаан.
Республиканың яамыларының болгаш ведомстволарының удуртукчулары харыылап турар кожууннарынче үнүүшкүннерни хүннүң кылып турар. Чазак кежигүннери январь 3-тен тура ол ажылды чорудуп эгелээн.
«Күүсекчи эрге-чагырга органнарының удуртукчулары харыылап турар кожууннарының чагырга даргалары-биле сырый харылзаалыг турар ужурлуг. Ажыл-агыйжы сургакчылаашкыннарын отчёттаарын дугурушкан бис. Ооң чорудуу-биле мээң коллегаларым чүгле оперативтиг байдалды эвес, байырлал хемчеглериниң шынарын база хынаар ужурлуг» — деп, Тываның Баштыңы чугаалаан.
Чазак кежигүннери үнүүшкүннериниң үезинде одалга сезонунуң канчаар эртип турарын, чуртталга-коммунал ажыл-агый бүдүрүлгелериниң, социал объектилерниң ажылын, кожууннарның чурттакчыларынга спортчу болгаш культура хемчеглериниң организастаашкынын хынап турар. Ол ышкаш назы четпээн ажы-төлдүң амыдыралының байдалын хайгаараары-биле айыылдыг бөлүкке хамааржыр өг-бүлелерге патронаж ажылы база чоруп турар.
Дүүн, январь 7-де, Чазак Даргазының оралакчызы Орлан Сарыглар Чеди-Хөл кожуунга чораан.
«Хову-Аксының ЧЭТ штаттыг чурумда ажылдап турар, хөмүр курлавыры-биле хандыртынган. Школада спортчу болгаш чогаадыкчы кичээлдерни организастаан, ол ышкаш олимпиадага киржир өөреникчилерге консультацияларны база эрттирип турар. Культура бажыңында ТШО киржикчилеринге тураскааткан аныяк мөгелер аразынга хүреш маргылдаазы болуп турар, а 14 шакта аңаа «Саян» ансамблиниң болгаш Тываның улустуң артизи Станислав Ирильдиң концертти болур» - деп О. Сарыглар дыңнаткан.
ТР-ниң экономика сайыдының хүлээлгезин күүседип турар Снежана Ховалыг Улуг-Хем кожуунга чорааш, Шагаан-Арыг хоорай, Чодураа, Хайыракан сумуларга четкен. Ооң чугаазы-биле алырга, кожуунда байдал тайбың, онза байдалдар илереттинмээн. Сумуларже оруктарны аштап-арыглап каан. Шагаа-Арыгда котельная штаттыг чурумда ажылдап турар.
Тере-Хөл кожуунга одалга болгаш энергетика сайыды Эдуард Куулар, Мөңгүн-Тайга, Өвүр болгаш Тес-Хем кожууннарга орук-транспорт сайыды Шораан Чыргал-оол ажыл-агыйжы үнүүшкүннерни кылган.
Январь 7-де Чөөн-Хемчик кожуунче кадык камгалал сайыды Анатолий Югай, Таңдыже – күш-ажыл болгаш социал политика сайыды Эдуард Сандан, Өвүрже – көдээ ажыл-агый сайыды Юрий Оруспай, Кызыл кожуунче – Тарифтер талазы-биле албан чериниң удуртукчузу Елена Бочарова, Бии-Хемче – Националдар херектериниң талазы-биле агентилелдиң директорунуң хүлээлгезин күүседип турар Арслан Калзан олар чорааш, комплекстиг хыналданы чоруткан.
Планнаашкын графиги езугаар үнүүшкүннер январь 8-ке чедир уламчылаар.
ТР-ниң Чазааның медээлеринден.
