ТР-ниң Баштыңы Владислав Ховалыг Россияның Айыыл чок чоруунуң федералдыг албанының Тыва Республикада кызыгаар эргелелиниң чаа удуртукчузу полковник Владимир Матвеев-биле ужурашкан.
«Ажыл-агыйжы ужуражылга үезинде кады ажылдажылганың чугула айтырыгларын чугаалаштывыс. Бир дугаар черде «Хандагайты» эрттирилге пунктузу, оон ыңай Кызыл хоорайның аэропортунуң чаартылгазы. Агаарга ужар болгаш чер орук-биле чоруур транспорттарның кайызының-даа даштыкы чурттар-биле харылзаазы Тываның социал-экономиктиг сайзыралынга чаа тынышты бээр дээрзи билдингир. Сибирьниң өске регионнарынга ук эрттирилге пунктулары ужур-дузалыг болур дээрзи чугаажок.
Тываның девискээринде Россия биле Моолдуң күрүне кызыгаарының шөлү барык 1400 километр. Ынчангаш кызыгаарга мал одарын хыналдага алыры чугула.
Россияның Айыыл чок чоруунуң федералдыг албанының Тыва Республикада кызыгаар эргелелин удуртуп турган Дмитрий Анатольевич Бобровка Тываның кызыгаар албан черинге киирген үлүг-хуузу дээш өөрүп четтиргенимни илереткеш, чаа ажыл-ижинге чедиишкиннерни күзедим».
О. ОНДАР белеткээн.
“Шын” № 85 2023 чылдың ноябрь 8
