Эрзин кожууннуӊ Ѳг-бүлеге болгаш уругларга социал дуза чедирер тѳвү 30 чылдаан юбилейин демдеглеп турар. Ук албан черин 1993 чылдыӊ декабрь 1-де Эрзин кожууннуӊ чагырга даргазыныӊ доктаалы ёзугаар тургускан.
Байырлыг хемчегге чалаттырган аалчылар, Тываныӊ Күш-ажыл болгаш социал политика яамызыныӊ тѳлээлери база ук адырныӊ хоочуннары кээп, Тѳптүӊ үндезилеттинген тѳѳгүзүнүӊ дугайында чылыг сактыышкыннарын үлежип, ѳг-бүлеге болгаш чаштарга ооӊ ачы-дузалыг ажыл-чорудулгазын үнелээн.
Социал дузаны ап чоруур улус база байыр чедирген. Күрүнениӊ мурнундан социал хѳмүрнү берип, ѳг-бүлеге деткимчени көргүскени дээш хѳй ажы-тѳлдүг ие Айыраа Минчээ ѳѳрүп четтиргенин илереткен. 2021 чылдан тура үш чыл дургузунда ындыг дузаны ап чоруур дээрзин ол чугаалаан.
Тѳпте үш салбыр ажылдап турар. Хүндүскү, стационарлыг база дарый социал дуза чедирер салбыр. Оларныӊ кайызы-даа чугула ажылын күүседип, улус чонга дузалажып чоруур. Салым-чолунуӊ аайы-биле амыр эвес байдалдарга таваржы берген улуска дузалап, оларга чѳленгииш болуп, ѳг-бүлеге болгаш уруглар-биле профилактиктиг ажылдарны доктаамал чорудуп турар. «Социал хѳмүр» болгаш «Улусчу картофель» деп губернатор тѳлевилелдериниӊ амыдыралга боттандырыышкынын таарыштыр башкарып турар.
Тѳптүӊ ажылдакчылары улуг назылыг ѳгбелерже кичээнгей салып, олар дээш сагыш човап чоруур. «Старость в радость» деп ачы-буян фондузунуӊ «Неотложка» программазын билдилии-биле боттандырып, 65 хардан ѳрү назылыг улуг кижилерни эмнелге албан черинге чедирип турар.
Амыдыралы белен эвес байдалдыг ѳг-бүлелерге регионалдыг тѳлевилелдиӊ шугуму-биле автономнуг ѳрт медээчилерин салып берип турар. Айыыл чок чоруктуӊ магадылалы ол болур.
Тѳптүӊ специалистери социал керээниӊ дѳрт дугаар угланыышкыны-биле идепкейлиг ажылдап, комплекстиг хемчеглерни чорудуп келген. Ол дээрге амыдыралдыӊ берге байдалындан уштунуп, эки талаже ѳскерлип, чаа амыдыралчы оруун эгелээр күзелдиг кижилерни хаара тудуп, оларга деткимчени кѳргүзери.
Эрзин кожуун чагыргазының медээзинден.
“Шын” №87 2024 чылдың ноябрь 13
