Бистиң Мөрен суурда чонунга хүндүткелдиг, төлептиг кижилер кайы көвей. Ылаңгыя 60–70 хар аразында үлегерлиг, эрес-кежээ хоочуннар дыка хөй. Ол ышкаш янзы-бүрү спорт, культура хемчеглеринге дыка идепкейлиг, хөй-ниитижи аныяктар база бар.
Урана Ыңаалайның ажылгыр-кежээзин, кызымаан кайгап ханмас мен. Ол хой кыргылдазының үезинде эң-не идепкейжилерниң бирээзи болган. Урана Биче-ооловна бир хүнде 50–60 хойну кыргып кааптар болду. Бажың-балгат чугайлап, дозулаар кылбазы-ла чок, шалыпчы кижи.
Дыка хөй өскүс дуңмаларын азырап өстүрген Рита Дангытты база адап болур. Рита Бады-Шулууевна – хөй-ниити ажылдарының идепкейжизи. Ол көдээде малын малдап, ажы-төлүнүң өөредилгезинге деткимчезин көргүзүп чоруур.
Оон ыңай кат-чимис чыыр дыка кежээ херээжен чонувус бар. Оларның бирээзинге Эля Бады-Буяновна Сереңмааны адап болур. Ол чайгы, күскү үеде дыка хөй аңгы-аңгы каттарны чыггаш, вареньелеп, кышка белеткеп алыр.
Тускай шериг операциязында киржип турар чаңгыс чер чурттугларывыска деткимче көргүзер ажылдарда киржип турар Анюта Эрендей баштаан волонтёрларывыс бар. Олар дайынчы оолдарывыска камгаланыр четкилер кылырындан эгелээш, дузаламчы чыыр дээн ышкаш ажылдарда идепкейлиг киржип турарлар. Оларның эң-не идепкейжилеринге Мөренниң хурал даргазы Даң-Хая Күржепей, клуб даргазы Чаймаа Баанай, Урана Ыңаалай, Саяна Хүдер база өскелерни-даа адап болур.
Суурнуң клуб болгаш эмнелгеде ажылдап турар кыстарның ажылынга бердингенин, идепкейжизин база демдеглеп тур мен. Клубтуң болгаш эмнелгениң девискээринде тараан чараш чечектер карактарны өөртүп турар. Ында эрес-кежээ кижилер ажылдап турар деп чүүл оон-на көстүп турар.
Чечекмаа САДИ,
ТР-ниң алдарлыг ажылдакчызы.
Мөрен суур.
“Шын” №79 2024 чылдың октябрь 16