Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышевтиң удуртулгазы-биле хоойлуга чөрүштүр саң-хөө ажыл-чорудулгазынга удур демисежир ведомстволар аразының ажылчын бөлүүнүң хуралы болуп эрткен.
Ужуражылганың киржикчилери ажылчын бөлүктүң 2024 чылда ажыл-чорудулгазының түңнелдерин үндүрүп, бо чоокку үеде сорулгаларын тодараткан. Эрткен чылын ажылчын бөлүктүң ийи ужуражылгазында чигзиниглиг операциялар хөйү-биле чоруп турар округтуң регионнарда хоойлуга удур даштыкы садыг-саарылга керээлериниң ажылын эвээжедирин база чажыт саң-хөө шилчидилгезинге удур демисежир айтырыгларны көрген.
Анатолий Серышев ведомство төлээлериниң демниг ажылын демдеглээн. «Чугаалажыышкынның түңнелинде ажылдап кылган хемчеглерниң күүселдези Сибирьниң регионнарында оперативтиг байдалды экижиткен» — деп, ол чугаалаан.
Бүрүн эргелиг төлээниң дыңнатканы-биле алырга, 2024 чылда округтуң эрге-хоойлу камгалаар болгаш контроль-хайгаарал органнарының протокол шиитпирлерин күүсеткениниң түңнелинде, валюта-экспорт болгаш чээли-саң-хөө контрольдаар адырларда 3 муң ажыг кем-херек үүлгедиишкиннери илереттинген, ол чүүл “хөлегеде” саң-хөө ажыл-чорудулгазын элээн эвээжедип, туда акшаже шилчидер аргалар саны 80 хуу эвээжээн.
«Сибирь федералдыг округта хоойлуга чөрүштүр саң-хөө ажыл-чорудулгазынга удур демисежир ведомстволар аразының ажылчын бөлүүнүң киржикчилери 2024 чылда салдынган сорулгаларын бүрүнү-биле күүсеткен деп санаар мен» — деп, бүрүн эргелиг төлээ эрткен чылдың түңнелдерин үндүрген.
Национал төлевилелдер күүселдезинче көрдүнген бюджет акша-хөреңгизиниң чарыгдалын күрүнеден контрольдаары — 2025 чылда ведомстволар аразының бөлүүнүң кол угланыышкыннарның бирээзи болур. Сибирь девискээринге 15 национал төлевилелди боттандырар, ниитизи-биле 694 ажыг млрд. рубль түңге 13,5 муң керээлерни чарган.
Ындыг болзажок округта национал төлевилелдер боттандырылгазында чурум хажыдыышкыннарының деңнели бедик болуп артпышаан деп, бүрүн эргелиг төлээ демдеглээн. Ылаңгыя Россияның саң-хөө мониторингизиниң регионнар аразының эргелели экономиканың «хөлегелиг» чарыынче 3 хире млрд рубльди шилчиткенин тодараткан.
Ужуражылганың түңнелинде бо талазы-биле хоойлу хажыдыышкыннарынга удур болгаш российжи экономиканың турум чоруун хандырар бөлүк хемчеглерни ажылдап кылган.
«Бистиң ведомстволар аразының ажылчын бөлүүвүстүң ажыл-чорудулгазының кол сорулгазы болгаш кол түңнели – акша-хөреңги хажыдыышкынынга удур демиселге күрүне эрге-чагырга органнарының бүрүн эргелерин каттыштырып, ведомстволар аразында кады ажылдажылганы чедимчелиг организастаары болур. Бо мурнады боттандырар угланыышкыннарны сагып чоруур ужурлуг бис» — деп, Анатолий Серышев түңнээн.