Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Иркутск облазынга ажылчын сургакчылаашкын үезинде регионнуң губернатору Игорь Кобзев база Хоойлужудулга Хуралының даргазы Александр Ведерников-биле ужурашкан.
Регионнуң социал-экономиктиг хөгжүлдези, чуртталга-коммунал адырында бүдүрүлгелерниң ажылы, газ-биле хандырылга – кол айтырыглар болган. Анатолий Серышев хамаатыларга таарымчалыг байдалды болгаш экономиктиг хөгжүлдени хандырарынга амыдырал-хандырылга системаларның бүзүрелдиг ажылдаары эң кол деп демдеглээн.
Ужуражылганың киржикчилери регионнуң социал-экономиктиг хөгжүлдезиниң мурнады шиитпирлээр кол айтырыы болур газ-биле хандырылганың келир үезин көрген. Игорь Кобзев «Сибирьниң күчү-шыдалы-2» газ дамчыдар шугум дургаар чыдар хоорайларже газты хуваап-үлээр станцияларны тударының аргаларын, ол ышкаш үлетпүр база социал газификация хереглелдеринге херек газтың хемчээлин көвүдедири эң чугула дээрзин демдеглээн.
Күрүне баштыңының даалгазы ёзугаар Иркутскуга чаа аэропорт тударының белеткелдерин база чугаалашкан. Ону тудар шөл кылдыр Ключевая оргулаажын бо чылын бадылаан. Регионнуң губернатору баштаан ажылчын бөлүктү тургускан. Баш бурунгаар төлевилел документилерин ажылдап турар. «Шынарлыг транспорт системазы» национал төлевилелдиң «Аэродромнарның кол четкилерин хөгжүдери» федералдыг төлевилелинче Иркутскуга чаа аэропорт тудуун киирген.
«Иркутск облазының Чазаа аэропорт тудуунуң айтырыын шиитпирлээрде, Росавиация биле Россияның Транспорт яамызы-биле планныг кады ажылдажылганы – шын болгаш дээштиг арганы шилип алган. Бүгү чүве базым аайы-биле боттанып турарын көрүп тур бис. Амгы үеде бистиң ниити сорулгавыс – тудугну акшаландырарының ажык-чарлыг тургузуун чедип алыры. Ооң иштинде идегелдиг инвесторларның киржилгези-биле» — деп, Анатолий Серышев демдеглээн.
Ужуражылга үезинде тускай шериг операциязының киржикчилерин деткиири болгаш тайбың амыдыралга оларны чаңчыктарарынче аңгы кичээнгейни угландырган. Игорь Кобзев «Маадырларның үези» президент төлевилели база «Ангараның маадырлары» регион программазы-биле ТШО киржикчилерин, хоочуннарны база дайынчы арга-дуржулгалыг өске-даа кижилерже угланган ажылдар дугайында чугаалаан. Программа тускай шериг операциязының киржикчилериниң, хоочуннарның болгаш өске-даа дайынчы арга-дуржулгалыг кижилерниң мергежилин болгаш карьеразын бедидеринче угланган. Эрткен дыштаныр хүннерде Иркутск облазынга «Ангараның маадырлары» программаның болгаш «Бурятияның патриоттары» өөредилге төлевилелиниң киржикчилеринге регионнар аразының хемчээ болуп эрткенин ол дыңнаткан.
Иркутск облазының бюджет хевирлээшкининде бергедээшкиннер турзажок, айыттынган төлевилелдерниң шуптузун боттандырары планнаттынган. Игорь Кобзев регионда кризиске удур комиссия тургустунганын база чогуур программа ажылдап кылдынганын бүрүн эргелиг төлээге илеткээн. «Ажылдың ийи кол угланыышкыны тодараттынган: бюджеттиң орулгаларын көвүдедир болгаш чарыгдалдарны эвээжедир. Берге байдалдар турза-даа, социал хүлээлгелер Иркутск облазының Чазааның мурнады боттандырар сорулгазы болуп арткан» — деп, ол немээн.
Анатолий Серышев ужуражылга үезинде Иркутск облазының Чазааның Даргазының бирги оралакчызы Андрей Соковиковка күрүне албанынга үре-түңнелдиг болгаш чедиишкинниг ажылы дээш РФ-тиң Президент Администрациязының Хүндүлел бижиин тывыскан. Ол амгы албан-дужаалынга бо чылдың октябрь 15-те томуйлаткан. Ооң мурнунда 2010 чылдың ноябрьдан Иркутск область талазы-биле федералдыг инспектор, а 2023 чылдың июльдан Хакас Республика талазы-биле кол федералдыг инспектор болуп ажылдаан.
А. МОНГУШ.
Чурукту ТР-ниң Чазааның парлалга албанындан алган.