Чуртка удур ажыглаттынган санкциялардан кандыг-даа хамаарылга чокка, Тываның бүдүрүлгелери бо хүннерде ажыл-агыйын соксатпайн, улам хөгжүдер, улам шапкынчыдар дээш, ажылдап турарлар.
Алдын-оол Бавуунуң удуртуп-баштааны фермер ажыл-агыйы чонга чугула херек дээн далган бүдүрер ажылды чорудуп турар. Фермер бодунуң ажылын «Агростартап–2020» грантының дузазы-биле эгелээн. Грант акшазы-биле далган бүдүреринге чугула херек тускай техниканы саткаш, дээрбени бүрүнү-биле чүмнээш, бо хүннерге чедир ажыл-агыйын чедиишкинниг чорудуп турар.
– Бир хүнде-ле 3,5 тонна арыг далганны бүдүрүп турар бис – деп, Алдын-оол Бавуу медеглээн. – Чуртувуска удур ажыглаттынган кызагдаашкыннарга торулбайн, чонувус дээш ажылывыс соксаш кынмайн, уламчылап турар бис.
“Национал продукция бүдүрер талазы-биле төп” деп КХН чоннуң улуг сонуургалын оттурган национал шайны, кондитер кылыгларын база улугларның-даа, бичиилерниң-даа ынакшылын чаалап алган “тыва мороженоени” бүдүрүп турар. Ук бүдүрүлгениң онзагай талазы – инвалид байдалдыг чонну ажылга хаара тудар талазынче кол кичээнгейни углап турарлар. Бүдүрүлгениң ажылдакчылары оларның бүдүрген барааннарынга чоннуң сонуургалы батпайн турарын, даштыкы күрүнелерниң чуртка удур чорудуп турар экономиктиг демиселиниң оларның ажылынга шаптык кадар харык чогун, ам-даа бүдүрүлге ажылының шапкынчыырын чугаалааннар.
#МыРаботаем #РеспубликаТыва #Бис_ажылдап_турар_бис
