Июнь 15-те Кызылга IV дугаар Делегей чергелиг “Азия төвүнде фанфарлар–2023” деп үрер хөгжүм оркестрлериниң фестивалы эгелээн. Ону Ада-чурттуң Улуг дайынынче тыва эки турачы танкычыларны аъткарганындан бээр 80 чыл оюнга тураскаадып эрттирип турар. Ооң-биле чергелештир “Енисейниң уруглары” деп I дугаар уругларның үрер хөгжүм оркестрлериниң аразынга фестиваль-мөөрей эгелээн.
Баштайгы хүнде уругларның үрер хөгжүм оркестрлериниң аразынга мөөрей Тываның В.М. Халилов аттыг күрүне филармониязынга эрткен.
Июнь 16-да эртенги шакта фестивальдың киржикчилери Тиилелге шөлүнге өшпес отка чечек салыр ёзулалды кылган. Ооң соонда Ленин кудумчузун дургаар Арат шөлүнге чедир оркестрлерниң парады болган. Ол-ла хүн чыылганнар фестиваль киржикчилериниң солун оюн-көргүзүүн Арат шөлүнге сонуургап көргеннер.
IV дугаар Делегей чергелиг “Азия төвүнде фанфарлар–2023” фестивальдың байырлыг ажыдыышкыны ол-ла хүн В.Көк-оол аттыг Национал хөгжүм-шии театрынга болган.
Фестивальда дараазында коллективтер киржип турар:
- РФ-тиң Камгалал яамызының Төп шериг оркестри (начальниги – Россияның алдарлыг артизи, полковник Сергей Дурыгин);
- ТР-ниң Чазааның Т. Дулуш аттыг үрер хөгжүм оркестри (дирижеру – ТР-ниң алдарлыг артизи Начын Донгак);
- 55-ки тускай мото-адыгжы (даг) бригадазының шериг оркестри (дирижеру – Петр Черников);
- Кызылдың президентиниң кадет училищезиниң шериг оркестри (дирижеру – ТР-ниң алдарлыг артизи Саян Салчак);
- “Тыва Джаз Бэнд” (дирижеру – ТР-ниң алдарлыг артизи Начын Донгак).
“Азия төвүнде фанфарлар” деп ооң мурнунда болгулаан фестивальдарга уругларның үрер хөгжүм оркестрлериниң киржилгези чаңчыл болу берген. Олар кезээде фестивальдың дең эргелиг киржикчилери турган.
А бо чылын “Енисейниң уруглары” деп I дугаар уругларның үрер хөгжүм оркестрлериниң аразынга фестиваль-мөөрейни чарлаан. Чалыы хөгжүмчүлер чүгле мөөрейге киржиринден аңгыда, “Азия төвүнде фанфарлар” фестивальдың программазында кирген улуг концерттерге база киржир.
Июнь 17-де Чадаананың Мерген-Херел Монгуш аттыг Культура бажыңының баарынга РФ-тиң Камгалал яамызының Төп шериг оркестри концерт программазын көргүзер. Ол-ла хүн В. Көк-оол аттыг Национал театрга “Енисейниң уруглары” деп I дугаар уругларның үрер хөгжүм оркестрлериниң аразынга фестиваль-мөөрейниң тиилекчилерин шаңнаар.
Июнь 18-те В.Көк-оол аттыг Национал театрга үш хонук дургузунда болган мөөрейлерниң түңнелдерин үндүрер болгаш фестивальдың байырлыг хаашкыны болур.
Фестиваль үезинде бүгү концерттерже кирери халас.
Бистиң корр.
Чурукту интернет четкизинден алган.
"Шын" №44 2023 чылдың июнь 17
