Тыва биле Хакас республикаларныӊ чазактары 2028 чылда «Азияныӊ уруглары» IX-ку делегей оюннарын кады эрттирер дээш, чагыг бижикти эрткен чылдыӊ төнчүзүнде киирип турган.
Делегей оюннарыныӊ оргкомитединиӊ кежигүннери ийи регионнуӊ спорт объектилериниӊ инфраструктуразы-биле таныжып, спортчу хемчегниӊ киржикчилерин хүлээп алыры таарымчалыг байдалды хынаар сорулга-биле чедип келген.
Бир эвес «Азияныӊ уруглары» спортчу маргылдааларны Тыва биле Хакасияга эрттирер деп шиитпирлептер болза, 30 ажыг чурттардан 3 муӊ кижи чедип келир. Спорттуӊ 17 кол болгаш беш немелде хевирлеринге маргылдаалар Абакан биле Кызыл хоорайга болур.
Шак ындыг улуг хемчээлдиг маргылдааларны эрттиреринге, аӊаа тааржыр спорт объектилери херек, аалчыларны, чалыы спортчуларны чурттадырының, оларны аай-дедир чедирериниӊ, аъшкарып-чемгерериниӊ бүгү стандарттарынга дүүштүр организастаарын угаап бодаары чугула дээрзин Тываныӊ спорт яамызы демдеглээн.
— Хостуг хүреш, бокс, сумо, баскетбол маргылдааларын бистиӊ республикавыска эрттирерин саналдаан бис. Шак мындыг янзылыг маргылдааларны бистиӊ спортчу объектилеривиске эрттирип болур. 2028 чылга чедир чаа спорт объектизин, хоорай инфраструктуразын немей туткаш, ажыглалга киирер, спортчу оюннарныӊ шупту киржикчилерин ынчан төлептии-биле уткуп хүлээп болур бис — деп, спорт сайыдының оралакчызы Саян Моӊгуш тайылбырлаан.
Эксперттер ажылыныӊ түӊнелдери-биле аналитиктиг шынзылганы белеткээш, ону делегей оюннарыныӊ оргкомитединиӊ эргелелинге бээр.
«Азияныӊ уруглары» спортчу оюннар Делегейниӊ олимпийжи оюннар комитединиӊ удуртулгазы-биле болуп эртер. Аӊаа бүгү Азияныӊ болгаш Европаныӊ чамдык чурттарыныӊ чалыы спортчулары киржир.
Эӊ-не баштай «Азияныӊ уруглары» 1996 чылда Якутск хоорайга болган. Ынчангаш Якут (Саха) Республиканы ук спортчу оюннарның төрүттүнген чери деп санаар. 2019 чылдан бээр ооӊ кышкы спортчу оюннары болуп турар.
2023 чылда «Азияныӊ уругларыныӊ» кышкы оюннары Кемерово обласка, чайгы оюннары 2024 чылда Якутияга болур.
2022 чылда чайгы оюннар Владивосток хоорайга болуп эрткен. Тываныӊ чалыы спортчулары Сибирь федералдыг округтуӊ чыынды командазыныӊ составынга турган. «Азияныӊ уруглары» делегей оюннарыныӊ хостуг хүреш биле хапсагай якут хүреш маргылдаазынга Эртине Иргит, Булат Ооржак мөӊгүн медальдарны чаалап эккелген.
ТР-ниң Чазааның медээлеринден Р. ДЕМЧИК белеткээн.
"Шын" №55, 2023 чылдың июль 26