Тываның ажылчын болгаш студент аныяктары Россияның Президентизи В. Путинниң Чарлыы-биле болуп эртер делегейде аныяктарның эң улуг болуушкунунга бистиң республиканы төлээлээр.
Фестиваль бизнес, медиа, чурттар аразының кады ажылдажылга, культура, эртем, өөредилге, эки турачы база ачы-буян, спорт адырларында, хөй-ниити амыдыралының янзы-бүрү угланыышкыннарында, ол ышкаш аңгы-аңгы уруглар организацияларын болгаш каттыжыышкыннарын төлээлээн элээдилерниң 20 муң хире российжи болгаш даштыкы аныяк лидерлерин хүлээп алыр.
Тываның Чазааның Даргазының оралакчызы Айдың Чюдюк тыва делегация-биле республиканың Чазаанга ужурашкан. Делегейниң аныяктар фестивалынга бистиң республиканы 17 аныяктар – республиканың дээди болгаш ортумак өөредилге черлериниң сургуулдары, күш-ажылчы организацияларның специалистери төлээлээр. Фестивальче олардан аңгыда, организакчыларга дузалажып беш волонтер аъттаныптар.
Фестиваль 2024 чылдың март 1—7 хүннеринде «Сириус» федералдыг девискээрге болуп эртер. Сочиге Олимпий оюннарын эрттирер дээш туткан Олимпийжи суурга киржикчилерни чыттырар. Россияның Президентизи Владимир Путин 2023 чылдың апрельде Бүгү-делегейниң аныяктар фестивалын эрттирер дугайында чарлыкка атты салганын сагындыраал. Татьяна хүнүнде студентилер-биле ужуражып турда, ужуражылганың бир киржикчизи 2017 чылда Сочиге болуп эрткен фестивальды ам база катаптап көрзе дээн саналын Президент деткээн.
Фестивальга киржир билдириишкиннерни эрткен чылдың июньдан бо чылга чедир хүлээп турган, чижилге улуг болганындан шупту кордакчылар шыңгыы шилилгени эрткен. Бүгү-делегейниң аныяктар фестивалы–2024 делегей чергелиг болуушкун апарган болгаш 2017 чылга деңнээрге, аңаа киржиксээн аныяктарның саны алды катап көвей болган. Чагыглар саны хөй болганындан, мөөрей шилилдезиниң үезинде эң хөй балл алган кандидаттарны организакчылар шилип алган. Аңгы-аңгы адырларда улуг ужур-дузалыг төлевилелдерни удуртуп, көскү көргүзүглерлиг чедиишкиннерлиг, шудургу болгаш хөй-ниитижи идепкейлиг аныяктар мурнады шилиттинген.
Вице-премьер Айдың Чюдюк тыва аныяктарга чагыын берип тура, Россияның шупту регионнары база делегейниң 180 хире чуртундан делегациялар киржир улуг масштабтыг, төөгүлүг болуушкуннуң киржикчилериниң санынче киргени дээш байырын чедирип, бистиң республиканы бедик деңнелге төлээлээрин күзээн.
Фестивальдың киржикчилерин эртем болгаш өөредилге, технологиялар болгаш инновациялар, культура болгаш уран чүүл, гуманитарлыг эртемнер болгаш социал адыр, спорт болгаш экология талазы-биле, ол ышкаш чогаадыкчы ужуражылгалар, спортчу маргылдаалар, культура-массалыг хемчеглер дээш өске-даа янзы-бүрү программалыг неделя манап турар. Фестивальдың киржикчилери бүгү-ле болуушкуннарны кады эрттиржип база организастажыр болганда, канчаар-даа аажок улуг арга-дуржулганы алырлар деп, организакчылар санап турар.
Тываның волонтёрлары харылзажып база найыралдажып четтигипкени дөрт африканчы күрүнеден киржикчилерни фестиваль үезинде аай-дедир үдээр. Тываның оолдар, уруглары фестивальдың ажыдыышкынында база шупту массалыг хемчеглер үезинде киискидер дээш, Тываның тугун Сочиже ап алганнар.
ТР-ниң Чазааның парлалга албаны.
«Шын» №16 2024 чылдың март 2