2026 чылдың эгези республиканың өөреникчилеринге дүшкүүрлүг, дүвүренчиг кылдыр эгелээн. Тываның 1900 ажыг өөреникчизи Бүгү-российжи өөреникчилер олимпиадазының регионалдыг чадазында киржип турар.
Чырык баштыг уруг-дарыг 24 аңгы эртемге билиглерин шылгап, эртем бүрүзүнүң шыпшыынче шылгарап үнер. Экономика, биология болгаш информатика эртемнеринге олимпиадалар болуп каапкан, арткан эртемнер февраль төнчүзүнге чедир ээлчег ёзугаар айыттынган үелеринде эртер.
«Ол дээрге анаа-ла бөдүүн мөөрей эвес, а келир үеде төрээн республикавысты сайзырадыр ужурлуг өзүп олурар эртемденнерге, IT-специалистерге, шинчилекчилерге келир үеже шыңгыы базымның эгези-дир. Салым-чаяанныг уругларны шак мынчаар улуг хемчээлдиг кылдыр деткиири чурттуң Президентизи В. Путинниң эгелээни «Аныяктар болгаш уруглар» деп национал төлевилелдиң ачызында боттанып турар. Тывавыстың келир үези угаанныг ажы-төлүвүстүң холунда, оларның чараш-чаагай чүүлдер кылыксаар дөскел чок чүректеринде деп сеткилим ханызындан бүзүреп турар мен. Олимпиаданың киржикчилеринге бодунга бүзүрээрин, бергелерден черле кортпазын күзээр-дир мен. Силерниң күш-ажылыңар болгаш салым-чаяаныңар дээрге-ле бистиң эң үнелиг эртиневис-тир» — деп, Тываның Баштыңы В. Ховалыг бодунуң блогунга бижээн.
Бистиң корр.
Чуруктарны Тываның Баштыңының блогундан алган.
“Шын №2 2025 чылдың январь 22
