Сүт-Хөл кожуунда кыштаглаашкын кандыг байдалда эрттип турарының дугайында ук кожууннуң көдээ ажыл-агый эргелелиниң дыңнадыы.
Бо хүнде Сүт-Хөл кожуунда кыштаглаашкын эки эртип турар. Малдың күш-деңгели эки байдалда.
Кожуунда 155 кыштаг бар, оларның 49-у чедери берге черлерде турар. Көдээ ажыл-агыйларда 9 биче бүдүрүлге, 88 арат ажыл-агыйлар, 1 көдээ ажыл-агый хереглел кооперативи база 930 өреге ниитизи-биле 3180 кижи мал азырап турар.
Малчын одарларда кудуктарлыг кыштаглар – 13, 19 аалче сугну дажып турар, чайгаар үнген кара суглар чанында 123 аал бар.
Амгы үеде кожуунда малдың ниити баш саны: мыйыстыг бода мал – 11532, оон иштинде инектер — 4360; шээр мал – 10888 баш, ооң иштинде төрүүр хой — 55628; чылгы мал – 4483 баш, ооң иштинде бе — 2209 баш; сарлык – 76 баш; хаван – 454 баш.
Кожуунда ниитизи-биле мал чеминге сигенни – 29817, тараа саваңын – 170, суланы 2980 тоннаны белеткээн.
Малчын коданнарже оруктар ажык, хар хөртүктевээн. Харның кылыны 15–20 сантиметр. Даштын агаарның температуразы -30, - 38 градус.
Бо хүннерде кожууннуң малчыннарынга болгаш мал-маганга дыш бербейн турар берге байдал – бөрүлерниң көвүдээни. Кожууннуң 7 сумузунда кокайлар аглаар 7 бригада тургустунган. Кожууннуң көдээ ажыл-агый эргелели аглаашкынче үнер бригадтарга кывар-чаар материал куттунуп алыр кылдыр, тускай программа ёзугаар көрдүнген 45 муң рубльди «Ак» заправкаже (Белек Монгуштуң) шилчидип берген. Бо хүннерде аглаашкын ажылдары чоруп турар.
А. СОЯН белеткээн.
“Шын” №98 2023 чылдың декабрь 23