Тес-Хем кожууннуң Хөл-Өөжү (Ү-Шынаа) суурда “Кадык камгалалы” национал төлевилелдиң кадык камгалалының бирги звенозун чаартыр программа-биле фельдшер-акушер пунктузунуң капитал септелгези чедиишкинниг доозулган.
Септелге ажылдарынче ФАП бүрүнү-биле кирген. Эрги шалаларын, дээвиирлерин, серилерин, соңгаларын болгаш эжиктерин шуптузун чаартып, солуп каапкан. Шалазын керамиктиг плиткалар-биле шыпкан. Дээвиирин гипсокартон-биле чаарткан, ханаларын база керамиктиг плиткалар-биле каастаан. Ол ышкаш чаа одалга системазын, радиаторларны болгаш хоолайны салган. Изиг, соок суг системазын база кылган. Септикти салгаш, кудукту база кастырып каан. Оран-саваның мурнуу талазын бүрүнү-биле чаарткан. Серизин чалгыгланчак демирлер-биле солаан. Иштики ажылдары база бүрүнү-биле доозулган.
Фельдшер-акушер пунктузунуң чаа оран-савазы ажыглалче киреринге бүрүнү-биле белен. Ооң капитал септелгези эмчилеп келген кижилерге, ында ажылдап турар эмнелге ажылдакчыларынга-даа эптиг байдалды тургузуп, суурнуң чонунга баштайгы эмчи дузазын чедирер байдалды канчаар-даа аажок экижиткен. “Кадык камгалалы” национал төлевилелдиң суурларда эмнелге албан черлерин чаартырынче угланган шынарлыг ажылы ооң кайы хире боттанып турарын көргүзүп турар.
Амгы үеде Хөл-Өөжүнүң чурттакчы чону амгы үениң негелделеринге дүүшкен эптиг албан черинге мурнундагызындан-даа артык шынарлыг эмчи дузазын алыр аргалыг болган.
Кадык камгалал яамызының медээлеринден.
“Шын” №91 2024 чылдың ноябрь 27
