Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев бөгүн Иркутск облазында ажылдап турар. Бүрүн эргелиг төлээ регионнуң баштыңы Игорь Кобзев-биле хөгжүлдениң чугула айтырыгларын чугаалажып, тускай шериг операциязының киржикчилериниң «Орус черниң хөмүрү» деп чуруктар делгелгезин көрген.
Иркутск облазының губернатору регионнуң хөгжүлдезиниң эң кол угланыышкыннарында байдалды Анатолий Серышевке илеткээн. Иркутск облазы экономиктиг күчү-шыдал, экспорт хемчээли, федералдыг бюджетче үндүрүг киирилделери дээн ышкаш кол көргүзүглер-биле федералдыг рейтингиде лидерлер санында кирип турарын ол демдеглээн. Игорь Кобзев нефть болгаш газ чыдынының тывыжы өскен, саазын, кадыг кылын саазын, ак-демир, эм-таң аймаан бүдүрери көвүдээнин чугаалаан.
Ужуражылга үезинде ада-чурттуң авиатудуунче онза кичээнгейни угландырган. Каттышкан авиатудуг корпорацияның тургузуунда «Яковлев» компанияга хамааржыр Иркутскиниң авиация заводунуң аэродромундан апрельдиң 29-та МС-21 лайнерниң чаа модели шенелде ужудуушкунну кылган. Күрүнениң технологтуг бот-догуннаашкынын хевирлээр чугула негелделериниң бирээзи – авиация үлетпүрүн хөгжүдеринде деп, бүрүн эргелиг төлээ демдеглээн.
Ужуражылганың киржикчилериниң чугаазы-биле алырга, полимерлерни долу-биле болбаазырадыр күштүг үлетпүр кластерин тургузары - регионнуң экономиказынга немелде идигни бээр. Бо чылын Усть-Кут хоорайда Иркутскиниң нефть компаниязының полимер заводун ажыглалче киирери планнаттынган. 2035 чылга чедир Сибирь федералдыг округтуң хөгжүлде стратегиязын боттандырар планче ук төлевилел кирген.
Бүрүн эргелиг төлээ тускай шериг операциязының киржикчилеринге болгаш оларның өг-бүле кежигүннеринге ачы-дуза айтырыгларын доктаамал контрольдап турар. Регион баштыңының дыңнатканы-биле алырга, амгы үеде Иркутск облазында тускай операция киржикчилеринге болгаш оларның чоок улузунга деткимчениң 39 хемчеглерин көргүзүп турар. 2025 чылда ону боттандырарынче 9,7 млрд. рубльди тускайлаан.
ТШО киржикчилеринден удуртукчу кадрлар белеткээр “Приангарьениң маадыры” төлевилелди ажылдаткан. Аңаа киржир дугайында муң ажыг билдириишкин кирген, амгы үеде мөөрейлиг шилилде чоруп турар, өөредилгениң эгези бо чылдың июльда планнаттынган. «Төлевилел киржикчилериниң боттары-биле чугаалажыры чугула» – деп, бүрүн эргелиг төлээ сагындырган. Ооң чугаазы-биле алырга, аңгы-аңгы профессионал билиглерлиг специалистерни кадрлар программаларынче киржир кылдыр хаара тудары чугула.
Ада-чурттуң Улуг дайынынга Тиилелгениң 80 чылын байырлаарын база аңгы чугаалашкан. Делегейниң ийиги дайынының чылдары-биле чаш үелери катчы берген кижилерге, ындыг хоочуннарның саны 69 муң ажыг, адрестиг деткимчени көргүзерин демдеглээн. Эмчи болгаш социал дузаны чедирер чугааны кылган.
Анатолий Серышев биле Игорь Кобзев тускай шериг операциязының киржикчилеринге тураскааткан «Орус черниң хөмүрү» деп хөрек чуруктарының делгелгезин көрген. Иркутск облазының И.Л. Копылов аттыг уран чурулга колледжизиниң 19 сургуулунуң ажылдары ында делгеттинген. Тускай шериг оперециязының киржикчизиниң, маадыр офицерлер болгаш солдаттарның, эмчилерниң болгаш Донецк болгаш Луганск улус республикаларда, Запорожье болгаш Херсон областарда тайбың амыдыралды камгалажып база дузалажып турар камгалакчыларның уран овур-хевирин тургузары – экспозицияның кол сорулгазы.
Президентиниң культурлуг инициативалар фондузунуң, Ада-чурттуң дайынчыларының өг-бүле комитединиң база Санкт-Петербургтуң Чазааның деткээни төлевилелде Россияның 15 ажыг региону киржип турар.
