Эрзин кожууннуң Бай-Даг сумузунда бо хүнде муң ажыг кижи чурттап турар. Сумунуң ийи каът культура одаа 1983 чылда туттунган.
Дөртен ажыг чылдар дургузунда чаңгыс-даа капитал септелге кылдынмаан көдээ клуб бо чылын «Культура» национал төлевилелинче кирген. Ол дээш бай-дагжылар дыка өөрүп турар. Акшаландырыышкын болу бээрге-ле, клубтуң оран-савазын бүрүнү-биле чаартыр дээрзин культура одааның директору Саяна Айыыжы дыңнатты.
«Клубувустуң капиталдыг септелгезин дыка үр чылдар ишти манап келген бис. Тываның көдээ культура бажыңнарының аразындан чаңгыс-ла бистиң клубувус «Культура» национал төлевилелге киржир аргалыг болган. Бо чылдың март айдан эгелеп септелге ажылдары эгелээр. Ынчангаш бүгү бай-дагжыларның мурнундан Тываның Чазаанга база ТР-ниң Культура яамызынга четтиргенивисти илередир-дир бис» — деп, Саяна Григорьевна өөрүшкүзүн илеретти.
Амгы үеде Бай-Дагның культура одаанда 8 кижи ажылдап турар: директор, уран чүүл удуртукчузу, аныяктар талазы-биле специалист, библиотека ажылдакчызы, ийи аштакчы, таңныыл, одакчы. Сумуда болуп турар бүгү-ле хемчеглер бо культура одаанда эртип турар. Бо-ла бүгү хемчеглерни уран чүүл удуртукчузу Аян Мандан-Хорлуу, аныяктар-биле ажылдап турар Юлдуз Сайын организастап турар. Клубтуң ийиги каъдында ном саңы база бар. Сумунуң номга ынак хоочуннары база школачылар аңаа үзүлбес кээр.
Культура одааның хоочун ажылдакчызы Байыр-кыс Кыргысты клубтуң эң-не кол ээзи деп болур. Ийи каът оран-саваның ишти-даштын арыг-силиг тудуп турар кижи ол.
«Бригад Дүпчүр аттыг культура одаанда 25 чыл ажылдап тур мен. Кызылдың көдээ ажыл-агый техникумун дооскаш, Мөрен совхозка 9 чыл ажылдааш, колхоз-совхозтар буурап дүжерге, 1999 чылдың декабрь 4-те ажылдап кирдим. Мынча чылдар иштинде кандыг бергелер турбаан, чеже директорлар солушпаан дээр.
Клубувусту чаа септелгеже киирип турарынга дыка өөрүп тур мен. Дыка ырак кудуктан флягага суглап алгаш, сугну чылыткаш, шаланы чуур-дур бис. Ынчангаш моон соңгаар клубтуң ажыл-агыйы сайзыраар, таарымчалыг байдалдар тургустунар дээрзинге идегеп тур мен» — деп, Байыр-кыс Очур-Хөөевна чугаалады.
Клубтуң демниг коллективи ачы-буян ажылдарынга, янзы-бүрү акцияларга үргүлчү киржип турарлар. Хостуг үелеринде тускай шериг операциязында чаңгыс чер чурттугларынче чорудар камгаланыр четкилер аргыыры оларның чаагай чаңчылы апарган.
Бай-дагжылар үрде манаан чаарттынган клувун четтикпейн манап турарлар.
Алдынай СОЯН.
Авторнуң тырттырган чуруктары.
“Шын” №3 2025 чылдың январь 30
