– Мен бо чорааш, угаанныг кижилерни кончуг хүндүлээр кижи мен.
– Чүге ындыг сен?
– Бодумга дөмей боорга...
***
Чүвүр дорзукта чүгүрген херээ чок, балдыр кошкакта байыыргаан херээ чок...
***
– Артыш, сени көөрүмге, почта чанында-ла турар, ында ажылдай бердиң бе?
– Авам, ачам, ооң соонда кырган-авам, кырган-ачам суг пенсиязын ап келир улус. Оларны кедеп турарым бо...
***
Школа директору интернаттың столоваязында ажылдап турар поварны кабинединге чалап эккелген.
– Найысылалдан корреспондент чедип келген. Сенден интервью алыр деп турар-дыр, Демир-ооловна – деп, ол чугаалаан.
– Менде аңаа бээр интерви деп чүве чок – деп хомудаан аянныг харыылаан.
***
– Кайнаар өөренир бодап тур сен, Айдың?
– Орус дыл факультединче кирер күзелдиг мен.
– Тергиин эки-дир. Орустаарың кайы хирел?
– Майтанып билир-ле мен...
***
– Мен ажылга тургустунуп алыр дээш чор мен ийин. Силерде чүү бар ирги?
– Кандыг ажыл кылыксаар силер?
–Шалыңы-ла хөй болза, кандыызы-даа ажырбас...
***
– Хүндүлүг Демир Херел-оолович, силер дээш соңгулдага үнүм берген мен. Силер депутаттың күштүг шынзылгазын холуңарга алган силер. Моон соңгаар силерге чүнүң-биле дузалап болур мен?
– Соңгулда эрткен соонда, силерниң меңээ херээңер чок... Дараазында соңгулда чоокшулап кээрге, ынчан таптыг чугаалашкай бис аан...
Василий МОНГУШ
«Шын» №18 2025 чылдың май 15