Эргим чаңгыс чер чурттугларым!
Шаг-тѳѳгүден бээр салгалдан салгалче дамчып келген тыва чоннуң ыдыктыг байырлалы – Шагаа-биле!
Шагаа дээрге, чаа чылдыӊ баштайгы хүн херелин уткуп, оран-делегейивиске ак-кѳгүвүстүӊ дээжизин чажып, чалбарып, кышты хүр-менди ашканывысты айтыржып, кожуун-чуртувус, кожа-хелбээвис-биле амырлажып-чолукшужур бурун ѳгбелеривистиӊ ужур-чанчылын сагыыр байырлал-дыр. Шаг чаазы келирге, аал-коданывыс-биле, аймак чонувус-биле даартагы хүнче чаа эчис-күзеливистиӊ сорулгаларын салып, төрел-аймаавысты эргип, аъжы-чемивисти делгеп белеткенип, шагаалажыр бис.
Чөөн чүк чоннарының чыл санаашкыны-биле, ногаан меңгилиг, ыяш олуттуг Улу чылын уткуп тур бис. Улу – чылдар дизииниӊ он ийи дириг амытаннарыныӊ аразында тоолчургу чугааларда кирген, күчү-күштү, мерген угаанны, чүге-даа тура дүшпес сорукту илередип турар. Ол хире күштүг, бир тускайлаӊ салдар-шынарлыг чыл кижи бүрүзүнге аас-кежикти, бедик тура-сорукту, чаагай чолду сөңнээр-ле болзунам! Кижи бүрүзүнүң Шагаада сеткилиниң ханызындан салган йөрээлдери боттанып, бүдер-ле болзунам!
Республикавыстыӊ социал-экономиктиг хѳгжүлдезиниӊ бүгү адырларын, ажыл- агыйын чаңгыс эп-сеткил, быжыг дем-биле хөгжүдүп, сайзырадыылыңар! Күчүлүг Россияныӊ бот-догуннаан чаагай чоруу, келир үези дээш тускай шериг операциязында киржип турар эрес-дидим дайынчы оолдарывыска каң дег кадыкшылды, хей-аъды бедик болурун күзеп каалы.
Чурттуӊ Президентизи В.В. Путин бо чылын бүгү чуртка Ѳг-бүле чылын чарлаан болгай. Үнүп орар Улу чылы ѳг-бүле бүрүзүнге ѳѳрүшкү-маңнайны, ѳлчей-кежикти, аас-кежиктиг амыдыралды, чаа-чаа чүүлдерже чедиишкиннерни, чүткүл сорукту, ѳндүр сүлде-сүзүктү сѳӊнээр-ле болзунам!
Шаг чаагай, Шагаа чаагай! Курай-курай!
Тываның Баштыңы В. ХОВАЛЫГ.
"Шын" №10 2024 чылдың февраль 10
