Байыр чедириишкини

Тываның Баштыңы Владислав Ховалыг ТР-ниң Үндезин хоойлузунуң хүнү-биле байыр чедирген:

- Бөгүн күрүне байырлалы – Тыва Республиканың Үндезин хоойлу хүнү. Ону бадылаандан бээр 22 чыл эрткен. 1993 чылда Тываның Дээди Хуралының хүлээп алганы Үндезин хоойлузунга бодаарга, амгы үениң хоойлузу 14 чылдың нүүрүн көрген. Шак мындыг үр хуусаа дургузунда ооң быжыг туруштуг болганының чажыды – билдилиг Төлээлекчилер хуралының ачызында, ону чогуур деңнелге ажылдап кылганы деп бодаар мен.

Үстүнде айыттынган чылдар дургузунда Үдезин хоойлунуң өскерилгелери болгаш эдилгелери бистиң ниитилеливистиң сайзыралынга улуг үлүүн киирген. Ынчалза-даа ооң чугула тургузуу өскерилбээн. Республикавыстың Үндезин хоойлузу бистиң, кижи бүрүзүнүң, эргелерин болгаш хостуг чоруун камгалап, төрээн Тывавысты сайзырадыры-биле бодунуң эчис сорулгаларын ам-даа улаштыр күүседир дээрзин бүзүреп тур мен.

Хүндүлүг чаңгыс чер чурттугларым, байырлал-биле, Тыва Республиканың Үндезин хоойлузунуң хүнү-биле!