Чыл кандыг эрткенил?
Бичии уруглар болгаш өг-бүле психологу Сайлык Кыргыс:
– 2023 чылда меңээ кайгамчык чыл болган. Бир дугаарында, тускай шериг операциязындан ачам чедип келген. Ол бистиң өг-бүлевиске улуг белек болган.
Ажыл-агыйымга эң-не онзагай болуушкун – “Гаджеттер болгаш оларның чаш уругнуң организминге салдары” деп семинарны ада-иелерге эрттиргеним. Ол дугайын шагда-ла боданып келген мен. Бо чылын ада-иелерге болгаш чаштарга ажыктыг болзун дээш социал четкилерде арыннарымның сайзыралын күштелдирдим. Ол ышкаш бүдүн чыл дургузунда 100 ажыг кижиге психологтуг арга-сүмелерни, дузаны чедирдим. Амгы үеде ада-иелерниң ажы-төлүнүң психологиязын сонуургап турары өөрүнчүг-дүр.
Амы-хууда чуртталгамда уттундурбас болуушкун – өөм ээзи-биле Россияның аңгы-аңгы хоорайларынче дыштанганым. Өг-бүлевис 2 ажы-төлдүг бис.
Чыл дургузунда ындыг-ла кончуг бергедээшкиннер турбаан. Бо чылын 4 дугаар дипломумну алдым. Ам-даа 2 өөредилгени эртип турар мен. Дээди өөредилге чери өзек билиглерни берип каарга, специалист кижи бодун улаштыр сайзырадыр ужурлуг. Ол дээрге үргүлчү немелде өөредилгени эртип, билиин бедидип ап турары чугула. Ынчангаш шынарлыг ажылдаар деп бодаар болза, бодумну сайзырадыр, мергежилимни бедидер ужурлуг мен.
Чаа чылда шупту тыва чонумга төнчү чок аас-кежикти, чаагай чорукту, сагыш-сеткил болгаш мага-бот талазы-биле быжыг кадыкшылды күзедим. Бодуңарны өскелер-биле кажан-даа деңневеңер. Бар чүүлүңерни үнелеп чоруңар. Бодуңарга ынак болуңар, бодуңарны камнаңар!”
Чыжыргана СААЯ
«Шын» №100 2023 чылдың декабрь 30
