Кандыг-даа херээжен кижи кылагар, суук, чараш чаштыг болуксаар болгай. Ынчангаш үргүлчү ону ажаап, чараштыр өстүрерин бодаар. Ындыг-даа болза, чамдыкта, ылаңгыя кышкы үеде кижиниң чажы бүлүргей, сыйлыычал, дыңнангыр эвес апаар. Ооң чылдагааннары хөй: кургаг агаардан, «гиповитаминоз» – витаминнер чедишпезинден, температураның үзүктелиишкининден (кудумчуда соок, бажыңда чылыдылга системазы ажылдап турар), кышкы үеде организм бодун чылыдар дээш, хөй калорий чарыгдаар. Чамдыкта меге билиишкиннерден, шын эвес ажаалдадан база бооп болур. Ынчангаш дараазында дүрүмнерни сагыырын сүмеледивис.
Хөй чуп болбас
Хөй чуурга, эки деп бодал бар. Ол шын эвес. Баш дүгүн хүннүң-не шампунь-биле чуурга, куйганың бойдустан балансызын үреп кааптар. Баш дүгү кургааш, куйганы кижидер. Куйганың камгалал функциязы катап тургустунары-биле, ийи хонгаш чуур кылдыр чаңчыгып алыңар.
Изиг суг — дайзыны
Изиг суг дүктүң алыс шыгын чидириптер. Изиг сугга дүк казырыкчыгаштары (кутикул) ажыттынгаш, кемдээчел апаар. Ынчангаш баштай чылыг сугга чуггаш, оон сериин сугга былгап чуур. Соок сугга дүктүң казырыкчыгаштары хагдынгаш, кылагар болдурар.
Кондиционер — өңнүү
Дыка хөй кыс улус кондиционерни чажының дөзүнге чаап турары шын эвес. Шынында чаштың дөзүнге дээспейн, узун дургаар ужунга чедир чаар. Кондиционер узун чашты хоюг болгаш дыңнангыр болдуруптар. Дөзүнге чаарга, чаш үстелчек болгаш аар апаар.
Термокамгалал
Фен, плойка, утюжок… Амыдыралывыста солуттунмас херекселдер-дир. Изиг температура дүктүң тургузуунда белоктарны үреп кааптар — сыныычал болгаш кошкак апаар. Ынчангаш бо херекселдерни ажыглаар мурнунда баш дүгүнче термокамгалал чаштырып алыры артык эвес.
Шыгыдары
Баш дүгү кижиниң кежи-биле дөмей шыгыдарынга хереглелдиг. Ынчангаш шыгыдар маскалар болгаш үстерден ажыглаңар.
Шампуньнар
Шампуньнар аңгы-аңгы болур: үстүг, кургаг, өй-тап чаштарга, кылаңнадыр, объём бээр дээш оон-даа өске. Шын эвес шилээн шампунь чашка хораны чедирип болур. Чижээ, чажыңар кургаг болза, үстелчек чашка ажыглаар шампунь ону улам кургадыптар.
Дыраары ажыктыг
Узун чашты дыраары чүгле эдип-чазаарында эвес, баш дүгүнүң чайгаар бүткен үзүн узун дургаар чагган ышкаш болур. Ол чашты шыгыдар болгаш камгалаар.
Аржыылдар
Чамдыкта баш чуп тургаш, далаш-биле дүрген-не аржыыл-биле чода тударын бодаар болгай бис. Ындыг хамаарылга чашты үреп болур, ылаңгыя дүктегер (махровый) аржыыл ажыглап турар болзуңарза. Башка чымчак микрофибра азы торгу аржыылдар ажыглаарга эки. Микрофибра сугну эки сиңирер, а торгу дүктүң тургузуунга хора чедирбес.
Ийи катап чуур
Баштың куйгазын чыылган хирлерден, кеш үстеринден база косметиктиг херекселдерниң артынчыларындан арыдыр чуур. Бир дугаарында, шампуньну куйгага дээскеш, салаалар-биле эки көвүктелдир нугуур, оон чоорту узун дургаар чуп бадырар. Ийи дугаар чуурда, шампуньну башка каш минута тургузупкаш, оон эки чуп кааптар.
Чуруктарны интернеттен алган.
“Шын” №5 2025 чылдың февраль 13