Диспансеризацияны 18 хардан 39 харга чедир кижи бүрүзү боттарының кадыкшылының байдалын баш удур билип алгаш, эмнедири-биле 3 чылда 1 катап эртер ужурлуг. А 40 хардан өрү назылыглар чылдың-на эртер.
Хоорай поликлиниказынга чурттакчы чон ажыл хүннеринде эртенгиниң 8.00 шактан хүндүскүнүң 16.00 шакка чедир диспансеризацияны эртип алыр аргалыг. Ажылдап турар кижилерни эмчилеп алзын дээш, субботаларда 09.00 шактан 14.00 шакка чедир база профилактика салбырының эмчилери ажылдап турар.
Хоорай поликлиниказында ниитизи-биле 54001 кижи бүрүткеттинген. 2023 чылда оларның аразындан 24716 кижи диспансеризацияны эрткен. Ооң түңнелдери-биле таакпыны хемчээлинден хөйнү тыртып турар улустуң саны 373 кижи четкен. 340 кижи шын эвес чемненип турары илереттинген. Хан-дамыр аарыгларындан 4922 кижи аарып турар, ханының базыышкыны улуг 4651 кижи бар. Чем хайылдырар органнар аарыгларындан 988 кижи аарып турар. Оларның иштинде 790 кижи гастриттиг.
Диспансеризацияның түңнелдери-биле чурттакчы чонну 3 аңгы бөлүкке чарар. Бирги бөлүкке кадык улус хамааржыр. 2023 чылдың көргүзүглери-биле бо бөлүкче 5310 кижи кирип турар. Ийи дугаар бөлүктүң кижилери хоочураан аарыглары чок-даа болза, багай чаңчылдарның, шын эвес чемненилгениң, шимчээшкин чок чоруктуң салдарындан, агаар-бойдустуң хирленгенинден хоочураан аарыгдан аарып болгу дег улус болур. Аңаа хамааржыр 2138 кижини диспансеризацияның дараазында чадазын эртери-биле чорудуптар. 3 дугаар бөлүк А биле Б деп 2 хевирге чарлыр. 3А бөлүкке хамааржыр халдавыр чок хоочураан аарыглардан аарып турар 3699 кижи бар. 3Б бөлүктүң кижилери халдавыр чок хоочураан аарыгдан аарывайн-даа турар болза, шыңгыы эмчи шинчилгезин хереглеп турар улус болур. Оларның саны 2371 кижи.
Аарыгларны кедеретпейн, үе-шаанда эмчи шинчилгезин эртип ап турары күзенчиг. Эмчилерге-даа, кижиниң бодунга-даа ол кончуг ажыктыг болур.
Бистиң корр.
Чурукту интернеттен алган.
“Шын” №81 2023 чылдың октябрь 25