РФ-тиң Президентизи Владимир Путин өөредилге адырын хөгжүдүп, башкыларның үнезин бедидери-биле, «Классная тема» деп төлевилелди ВКонтакте социал четкиниң деткимчези-биле үндезилээр даалганы РФ-тиң Чырыдыышкын яамызынга болгаш Россияның 1 дугаар каналынга берген турган.
Россияның аңгы-аңгы регионнарының башкылары ук мөөрейге киришкен. Регионнарынга тиилээн башкылар чылдың төнчүзүнде чурттуң кол телеканалы «Россия1-ге» болур «Классная тема» деп шоуга киржир эргени чаалап алыр турган.
Красноярск хоорайдан, Пермь крайдан болгаш Сахалин, Новосибирск, Астрахань, Белгород областьтарының башкылары мөөрейниң финалынче киргеш, теле-шоуга киржир эргени алган. Финалга бирги чер дээш адааннашкан башкыларның даалгазы – шоу-кичээл эрттирери. Россияның алдар-аттыг политиктери, артистери, спортчулары теле-шоуга аалдап келгеш, башкыларга дузалажып, кичээлдиң өөреникчилери болган.
Башкы бүрүзүнүң кичээли уругларның кичээнгейин хаара тудуп, теле-шоуну көрген кижи бүрүзү салдыкпайн баар солун болган.
Саранск хоорайдан химия башкызы Екатерина Чугунова «Классная тема» деп теле-шоунуң үш дугаар сезонунга тергидээш, федералдыг каналга бодунуң чогааткан шоузун эрттирер эргени чаалап алган.
«Үш дугаар чыл улай «Классная тема» деп шак бо кайгамчык төлевилелди эрттирип тур бис. Ук төлевилелдиң ачызында башкылар бодун көргүзүп, тывызык талантызын ажыдып турар. Бо төлевилел дооступ турда, шоунуң киржикчилери уран-талантылыг башкыларны чүгле школада өөреникчилери эвес, кудумчуга, садыг-саймааларга, культурлуг дыштанылга черлеринге кижи бүрүзү таныыр апаар. Ол чүнү чугаалап турарыл дизе, башкы мергежил чылдан чылче билдингир болгаш ат-алдарлыг апар чыдарының бадыткалы-дыр. Башкы кижиниң эрге-байдалын бедидер дээш, ам-даа бүгү-ле аргаларны ажыглап, чогуур хемчеглерни чорудар бис. «Башкы – чырык чер кырында эң-не кол бурунгаар көрүштүң мергежили» деп, Роберт Рождественский анаа эвес бижээн. «Классная тема» теле-шоунуң үш дугаар сезонунуң финалынче кирген башкыларга, шуптуңарга байыр чедирип тур мен» – деп, Россияның чырыдыышкын сайыды Сергей Кравцов чугаалаан.
Теле-шоунуң тиилекчизи Екатерина Чугунова мөөрейге киришкени аңаа улуг болуушкуннарже езулуг аян-чорук болган дээрзин чугаалаан: «Төлевилелге киришкеш, чүгле бодумнуң билиимни эвес, а химия эртеминге ынакшылымны көргүзер арга болду. Эгезинден-не бодумну бир-ле улуг болуушкуннуң хензиг кезии кылдыр бодап чордум. Ажык кичээлди көрүкчүлерниң сеткилинге, угаан-бодалынга артып каар кылдыр эрттирер деп шиитпирлээн турган мен. Көрүкчүлер-биле аравыста чугаа болдунуп, көвүрүгнү тургузуп шыдаптым. Төлевилелге киришкеш, өөрүшкү алганым бүгү чуртталгамга уттундурбас болуушкун болуп артар. Бодумнуң республикамны, школамны төлээлээнимге, билиимни көргүскенимге чоргаарланып тур мен. Бо төлевилел меңээ башкының мергежили үнелиг, кижилерге тура-сорукту киирип, билиивис-биле үлежип, бир-ле ажыктыг чүүлдү киирип болур-дур бис деп чүүлдү бадыткап турар».
Башкылар – чурттуң байлакшылы. Олар чүгле билигни эвес, а бүгү сагыш-сеткилинден өөреникчилеринге бердинип чоруур. Олар уруглар, оолдарның ийи дугаар ада-иези дег, оларга патриотчу, шынчы чорукту болгаш харыысалгалыг болурун хүн бүрүде өөредип чоруур. Башкыларга шак мындыг теле-шоуну организастап, оларның үнезин бедидип, уран талантызын көргүзер арганы регионалдыг болгаш федералдыг деңнелге берип турары өөрүнчүг-дүр.
«Классная тема» – чүгле мөөрей эвес, а өөредилге адырының келир үези дээрзи билдингир. Эрткен чылын Тывадан ук мөөрейге беш башкы киришкен.
ВКонтакте социал четкиде «Классная тема» деп аттыг бөлүк ажыттынган. Ында ук мөөрейниң негелделерин, аңаа канчаар киржирин болгаш шилилге кастинг дугайында удаа-дараа медээлеп турар. Ол бөлүкте башкылар, өөреникчилер, ада-иелер база өөредилге адырынга сонуургалдыглар бар.
«Классная тема» теле-шоуга элээн каш компаниялар деткикчилээш, финалче кирген чеди башкыга белектерни сөңнээн.
Айдың ОНДАР.
Чуруктарны интернет четкизинден хоолгалаан.
«Шын» №1 2025 чылдың январь 16
