2013 чылдың май 13-те республикага “Тува 24” телеканал ажыттынган. 2023 чылда ол мугур 10 чылын демдеглеп турар. Июнь 2-ниң хүнүнде Аныяктар өргээзиниң хуралдаар залынга Тываның Баштыңы Владислав Ховалыг база өске-даа албан черлериниң төлээлери “Тува 24” телеканалдың коллективин, хоочуннарын, ону тургузарынга үлүг-хуузун киирген буянныг кижилерге 10 чылдаан байырлалын таварыштыр чылыг-чымчак сөстерни, күзээшкиннерни чугаалап, телеканалдың келир үеде хөгжүлдезин алгап-йөрээп, байырны чедирген.
“Ук каналдың тургустунуп келгениниң дугайында документалдыг фильмни көргеш, аажок сонуургап, эге үезинде кайы хире берге турганын эскердим. Телеканалдың аалчылары мындыг хөй болурун бодавадым. Улаштыр канчаар кады ажылдаарының дугайында ужуражылганы ооң соонда кылыр бис. Силерниң-биле чугаалажыр чаа-чаа бодалдар, сорулгалар бар. Келир үеде ажыл-ижиңерге чедиишкиннерни, коллективтиң кежигүннеринге, хоочуннарынга кадыкшылды күзедим” – деп, Тываның Баштыңы Владислав Ховалыг чугаалаан. Улаштыр телеканалдың шылгараңгай ажылдакчыларынга шаңнал-макталдарны ол тывыскан.
Тыва Республиканың Баштыңының өөрүп четтириишкин бижии-биле ак сеткилдиг ажылы дээш Тува 24 телеканалдың инженери Роман Ямбиль база телеканалдың кол режиссёру Софья Сааяны шаңнаан.
Тува 24 телеканалдың тургустунарынга үлүг-хуузун киирген хоочун Тамара Кабимульдинова “Тыва Республиканың алдарлыг ажылдакчызы” деп хүндүлүг атка төлептиг болган. “Ол бистиң дагдыныкчывыс, телевидениениң режиссёру, хөй-хөй төлевилелдерниң автору, бүгү-ле ажылдың эксперди болгаш координатору” – деп, телеканалдың төлээлери чугаалап турар.
Оон аңгыда, ТР-ниң Дээди Хуралының (парламент) Даргазының оралакчызы Виктор Глухов Тува 24 канал-биле сырый харылзаалыг ажылдап чоруурунга өөрүп четтиргенин илередип, коллективтиң ажылын үнелээн. ТР-ниң Дээди Хуралының Хүндүлел бижии-биле үре-түңнелдиг ажылы, бедик мергежилдии дээш Тува 24 телеканалдың корреспондентилери Эрес Монгушту, Чинчи Кууларны, шеф-редактор Наталья Маспык-оолду, оператор Шолбан Монгушту шаңнаан. Ол ышкаш ТР-ниң Дээди Хуралының Даргазының өөрүп четтириишкин бижиин Тува 24 телеканалдың шеф-редактору Бадма Даржаага тывыскан.
Байырлыг хуралга билдингир журналистер келгеш өөрүп четтиргенин илередип, телеканалдың тургустунуп келген үезинден тура сактыышкыннары-биле үлешкен. Коллективтиң кол курлавыры аныяктар-даа болза, оларның артында бүзүрелдиг чөленгииш болуп, арга-сүмезин кадып, журналистика мергежилинге өөредип чоруур хүндүлүг кижилер хоочуннар дээрзин олар демдеглеп турар. Оларның бирээзинге телеканалды тургускан алдарлыг журналист Роман Тас-оол хамааржыр.
Тува 24 телеканалдың коллективи республикада янзы-бүрү албан черлериниң, яамыларының парлалга албанының төлээлери-биле доктаамал кады ажылдап чоруур. Телеканалдың үе-шаанда эң-не чугула болгаш чидиг айтырыгларны чырыдып турарынга, оларга уткуй базым кылып, идепкейлиг кады ажылдап турары база улуг рольду ойнап турарын чугулалап демдеглээн.
Тываның Журналистер эвилелиниң даргазы Эльвира Лифанова, РФ-тиң Тыва Республикада Социал фонд килдизиниң удуртукчузу Светлана Кенден, ТР-ниң прокурору Сергей Дябкин, “Чаңгыс демниг Россия” партиязының Тывада регионалдыг салбырының удуртукчузу Елена Ховалыг, ТР-ниң улусчу фронтузунуң регионалдыг салбырының, Тываның күрүне университединиң болгаш оон-даа өске албан черлериниң төлээлери телеканалдың 10 чылдаан оюн таварыштыр байырын чедирип, чылыг-чымчак сөстерни илереткеннер.
Ол ышкаш ТР-ниң алдарлыг артизи Долума Чымбалак, Сайын-Херел Өпей, “Тувамедиагрупп” информастыг агентилелдиң корреспондентизи Гюзель Күнзет олар чыылганнарга байырланчыг сеткил-хөөннү оттуруп, ыры-хөгжүмнү бараалгатканнар.
Юбилейлиг чылда телевидение ажылдакчыларының аразынга спартакиаданы, республиканың чараш черлеринче коллективтиг үнүүшкүннерни доктаамал чорудуп, коллективтиң чаа-чаа эгелээшкиннерин деткип турарынга Тывамедиагрупптуң директору Надежда Сатка четтиргенин Тува 24 телеканалдың коллективи илереткен.
/ Чыжыргана СААЯ.
Буян ООРЖАКТЫҢ тырттырган чуруу.
"Шын" №40 2023 чылдың июнь 3
