Республиканың уруглар садтарында школаларда ышкаш доозукчуларны үдээр байырлалдар болуп эртип турар.
Кызылдың 36 дугаар Найырал аттыг уруглар садынга май 22-ден 24-ке чедир “Байырлыг, уруглар сады!” деп доозукчулар балы болуп эрткен. Ук өөредилге черин ниитизи-биле 70 уруг доозуп, дараазында өөредилге чылында 1-ги классче киреринге белеткенип, башкылары-биле байырлашкан.
“Найырал” уруглар сады тургустунгандан бээр муң-муң доозукчуларны үдеп, школаже белеткээн. Оларның аразындан янзы-бүрү мергежилдиң кижилери үнүп, боттарының ажы-төлүн база ында эккеп турарлар.
Кайы-даа бөлүктүң байырлал бүрүзүнде уруглар боттарының 5 чыл дургузунда шиңгээдип алган билиглерин оюн-тоглаа хевиринге көргүскеннер. Оон алгаш көөрге, доозукчуларның хөй кезии школага белен дээрзи көстүп турар.
Уруглар садының удуртукчузу Елена Отук-оол доозукчуларынга ак орукту, чедиишкинниг өөренирин база бүгү-ле чүүлдерге экини йөрээп, өскен, төрээн уруглар садын утпазын сагындырган.
Ол ышкаш бичии бөлүктүң уруглары угбаларынга, акыларынга байырын чедирип, чүгле 4, 5 демдектерге өөренирин күзээн чаптанчыг шүлүктерин чугаалап, белек кылдыр ыр-шоорун бараалгаткан.
"Бир талазында, доозукчуларывыс чуртталганың чаа чадазынче шилчип турары өөрүнчүг, а өске талазында, сагыш-сеткилге чоок апарган чаптанчыг чаштарывыс-биле байырлажыры муңгаранчыг. Сактырга-ла, чоокта чаа уруглар садынче барып эгелээн ышкаш, а херек кырында удавас бирги классчы болурлар. Доозукчуларывыстың школачы амыдыралынга чедиишкиннерни күзедивис!” – деп, Елена Отук-оол чугаалаан.
Ч. КАРА-САЛ.
Авторнуң тырттырган чуруктары.
«Шын» №38 2024 чылдың май 25
