2023 чылдыӊ декабрь 15-тен 2024 чылдыӊ январь 13-ке чедир Баштайгыларныӊ эгелекчи саналы-биле «Россияныӊ уругларыныӊ Соок-Ирейи» деп акцияга 600 муӊ ажыг кижи киришкен. Ук акция таварыштыр чонга, янзы-бүрү адырларныӊ ажылдакчыларынга байырын чедирип, Чаа чылдыӊ байырымныг шинчизин кѳдүрүп, эӊ-не эки күзээшкиннерни сѳӊнээннер.
Соок-Ирей биле Харжыгаш кылдыр кеттинген Баштайгылар чежемейниӊ байырлалдыӊ дыштанылга хүннери таваржып-даа турар болза, шериг албан- хүлээлгелиглерге, ѳрт ѳжүрүкчүлеринге, камгалакчыларга, коммунал ажыл-агыйныӊ ажылдакчыларынга база улуг назынныгларга, волонтерларга, курьерлерге болгаш ѳске-даа тускай мергежилдиглерге аалдап чедип, байырын чедиргеннер.
Баштайгыларныӊ удуртур чѳвүлели Кызыл хоорайныӊ Чуртталга-коммунал ажыл-агый адырыныӊ, «Благоустройство» КУБ-туӊ ажылдакчыларынга Бүгү-делегейниӊ «Четтирдивис» деп хүнүн таварыштыр оларныӊ хүн бүрүде чымыштыг болгаш харыысалгалыг ажыл-ижи дээш ѳѳрүп четтиргенин илередип, аалдап четкеннер. Соок-Ирей биле Харжыгаш боттарыныӊ ѳӊнүктери болур Баштайгылар-биле ук адырныӊ ажыл-чорудулгазы-биле таныжып, ажылчын байдалга ужуражылганы эрттирген. «Благоустройство» КУБ-туӊ ажылдакчылары «Хүн бүрүнүӊ чымыштыг ажыл-ижиӊер дээш ѳѳрүп четтирип тур бис!» дээн чылыг-чымчак сѳстерлиг открыткалар алганынга аажок ѳѳрээннер.
«Россияныӊ уругларыныӊ Соок-Ирейи» деп акцияга республиканыӊ кожууннары идепкейлиг киришкеннер. Барыын-Хемчик кожууннуӊ Баштайгылары ук акцияга каттыжып, Соок-Ирей биле Харжыгаш кылдыр кеттинип алган ѳѳреникчилер боттарыныӊ суурларыныӊ чурттакчыларынга, садыгларынга, АЗС ажылдакчыларынга байырын чедиргеннер. Олар боттарыныӊ холу-биле чураан Чаа чылдыӊ открыткаларын, чараш чуруктарын белекке сѳӊнеп, кадыкшылды, аас-кежикти, бүгү-ле эки чүүлдерни күзээннер.
Баштайгылар уругларга Чаа чылдыӊ байырлалында белектер, байыр чедириишкиннери алыры дыка ѳѳрүнчүг, ынчалза-даа, ѳскелерге байыр чедирип, буянныг эки үүле кылыры оон-даа эки деп ѳѳредип турар.
Акцияныӊ хемчеглеринге эӊ бичии назылыг киржикчилер – Каа-Хем суурнуӊ «Звездочка» уруглар садыныӊ чаштары Мадина биле Сылдыс Соок-Ирей биле Харжыгаш кылдыр кеттинип алгаш, ёзулуг Соок-Ирейни дилээниниӊ түӊнелинде, олар тып алганнар.
Чаа чыл дээрге кижи бүрүзүнге тоолзуг, тывызыксыг онза чараш байырлал. Кижи бүрүзү ол байырлалды четтикпейн манап турар боор. «Россияныӊ уругларыныӊ Соок-Ирейи» деп акция дамчыштыр кижи бүрүзүнүӊ сагыш-сеткилин ѳѳртүп, оларга ѳѳрүп четтиргенин илередири база бир буянныг үүле деп Баштайгылар санап турар.
Бо чылгы акцияныӊ хемчеглери дыка солун, бир тускайлаӊ, омак-хѳглүг, кижи бүрүзүнге уттундурбас эрткен. Моон-даа соӊгаар мындыг буянныг, чараш акцияны уламчылаарын Баштайгылар тѳлевилеп турар.
Бистиң корр.
Чуруктарны интернеттен алган.