Май 19-та “Баштайгыларның шимчээшкини” Бүгү-россияның регионалдыг уруглар болгаш аныяктар шимчээшкини XXI дугаар хөй-ниити организациялар болгаш каттыжыышкыннар аразынга “Чээрби бирниң бир дугаары” деп республика чергелиг слетту эрттирип турар. Аңаа 200 ажыг уруглар бүгү республикадан чыглып киришкен.
Шимчээшкинниң удуртукчузу Эртине Кууларның дыңнатканы-биле, хемчегни Уругларның хөй-ниити организацияларының хүнүнге тураскаадып организастаан. Өске чылдарда шак мындыг байырлалды май 19 — Пионерия хүнүнде чылдың-на эрттирип турган.
“Организакчылар болгаш вожатыйлар өзүп олурар салгалга төөгүлүг хүннү сактып чоруур болзун дээш, пионер галстуктарны байырлалдың сүлде демдээ кылдыр баглап алганнар. Бо байырлалды организастап эрттиреринге студентилерниң башкы отрядтары дузалашкан. Олар чүгле волонтерлар болурундан аңгыда, уругларның дагдыныкчылары база болган- нар” — деп, ол чугаалаан.
Болган хемчег квест-оюн хевирлиг 12 угланыышкынга эрткен. Оларның аразында төлевилел сессиязы база болган. Аңаа уруглар сөөлүнде грантыже киирери-биле азы башкылары-биле кады боттандырып болгу дег аңгы-аңгы төлевилелдерни ажылдап кылып турар.
Хемчегниң кол сорулгазы келир үеде уруглар болгаш аныяктарның бүгү талалыг сайзыралынга салдарлыг болурун, ону эки нептередир сорулга-биле эрттирип турарын организакчылар демдеглээн. Болган хемчегге ниити өөредилге албан черлери, Тываның муниципалдыг тургузугларының немелде өөредилге черлери киришкен.
/ Бистиң корр.
"Шын" №36 2023 чылдың май 20
