"Сүбедей" спорт ордузунга октябрь 29-та, ноябрь 1–2-де Барыын-Хемчик кожууннуң олимпийжи курлавырлар школазының спорт залынга “Амгы база келир үениң спорту” деп төлевилелди боттандырары-биле, аныяктар аразынга баскетбол маргылдаалары болгулаан. Республиканың баскетбол чөвүлели баскетбол спортун хөгжүдер база шыырак ойнакчыларны, тренерлерни, шииткекчилерни деткиир сорулга-биле маргылдааларны бедик деңнелге организастаан.
Студентилерниң баскетбол каттыжылгазы республикага баскетбол шимчээшкинин шакпынчыдары-биле сонуургактарны боттарының талазынче кыйгырып база Тренерлер хүнүн уткуштур кызымаккай ажылдап турар тренерлерге, ылаңгыя республиканың улуг тренери Чойган Алексеевич Ондарга изиг байырын чедиргеннер. Баскетболдуң деңнелин көдүрери-биле Студентилер каттыжылгазы ноябрь 8-тен эгелеп Республиканың баскетбол чөвүлелинге кады ажылдаары-биле, бир дугаар хуралынче студентилер командазының төлээлерин, тренерлерни, капитаннарны кыйгырган.
Ортумак өөредилге черлериниң аразынга октябрь 29-та болган маргылдааның түңнелдери мындыг.
Кыс уруглар командалары: 1 дугаар черде транспорт техникуму, 2 дугаар – экономика болгаш эрге-хоойлу техникуму, 3-кү черде медицина колледжизи. Оолдар командалары: 1-ги черде медицина колледжизи, 2 дугаар – олимпийжи курлавырлар училищези, 3-кү — транспорт техникуму.
Барыын-Хемчик кожууннуң бирги чери дээш аныяктар аразынга 11 команда (8 эр, 3 херээжен), ниитизи-биле 110 ойнакчының киржилгези-биле болган баскетбол маргылдаазының түңнелдери.
Эр командалар: 1-ги чер — "17 регион" командазы (Барыын-Хемчик), 2-ги — "Ак-Довурак" (Ак-Довурак хоорай), 3-кү — "Дүжүт" (Барыын-Хемчик). Тускай шаңналдарга төлептиг болган ойнакчылар: “Часпас ойнакчы” атка Ай-Мерген Дойбаа, “Тергиин камгалакчы” — Санчат Монгуш, “Тергиин башкарыкчы” — Денис Монгуш, “Тергиин халдакчы" — Ай-Мерген Дойбаа.
Херээжен командалар: 1-ги черде "Барумчу" командазы (Барыын-Хемчик), 2-ги — "ДДТ" (Ак-Довурак), 3-кү — "Алдын-Булак". Тускай шаңналдарга төлептиг болган ойнакчылыр: “Часпас ойнакчы” — Алдын-Сай Салчак, “Тергиин камгалакчы” — Айдаана Ооржак, “Тергиин башкарыкчы” — республика чергелиг маргылдааларның тергиини Венера Хомушку, “Тергиин халдакчы" — Алдын-Сай Сарыглар.
Барыын-Хемчик кожууннуң командазы республика деңнелдиг маргылдааларга үргүлчү шаңнал-мактал ап, хөй удаа тиилекчилер болуп келгеннер. Бо удаа кожуунун- га бедик деңнелдиг маргылдааны эрттиргени улуг чоргаарал.
Алексей ЧАМБАЛ-ООЛ, хоочун спортчу.
“Шын” №86 2024 чылдың ноябрь 9
