ЧАЛЫМ ЧУЛДУМ-ООЛ РОССИЯНЫҢ МААДЫРЫ ХҮНДҮЛҮГ АТТЫ АЛГАН
55-ки гвардейжи мото- адыгжы (даг) бригаданың улуг лейтенантызы Чалым Сюндюпович Чулдум-оол Россияның Маадыры атты алган дугайында медээни Тываның Баштыңы социал четкилерде бодунуң арынында дыңнаткан.
Россияның Президентизи 2022 чылда күрүнениң болгаш чонунуң мурнунга маадырлыг чоруун көргүскен ачы-хавыяазы дээш ук атты тыпсырын доктааткан. Владислав Ховалыг Дээди Кол командылакчыга ындыг шиитпирни үндүргени дээш өөрүп четтиргенин илереткен.
– Тыва ам база бир маадырлыг болган! Шупту өөрүп тур бис! – деп, Владислав Ховалыг бодунуң блогунда бижээн. Россияның Камгалал яамызының дыңнадыында мынча деп бижээн: «2022 чылдың ноябрь 28. Дайынчы тулчуушкун үезинде хууда ачы-хавыяазы дээш (Чалым Чулдум-оол) «лейтенант» бирги офицер эргени тыпсып, мото-адыгжы (даг) батальоннуң командири албан-дужаалче шилчидер.
2023 чылдың декабрь 15-те Водяное суурнуң девискээринге от взводун ол билдилиг удурткан. Дайзынның 5 автомобилин ол бир дугаарында эскерип кааш, кончуг дүрген, шын шиитпирни үндүргеш, автомобильдерни чок кылыр бөлүктү боду баштап, дайзынның техниказынче углай үнүпкен. Дайзынның ийи автомобилин гранатометтан часпайн адып, чок кылган. Машинага арткан хууда состав бистиң дайынчыларывысче адып эгелээрге, лейтенант Ч.С. Чулдум-оол таарымчалыг турушту ээлепкеш, дайзынның күжүн узуткаан. Ол Украинаның чепсектиг күштериниң 10 хире дайынчыларын часпайн адып, узуткаан. Эрес-дидим, коргуш чок офицер дайынчы даалгазын эрес-дидим күүсеткен».
Чалым Сюндюпович Чулдум-оол Өвүр кожууннуң Чаа-Суур суурга төрүттүнген. Академик М.Ф. Решетнев аттыг Сибирьниң күрүнениң аэрокосмиктиг университедин дооскан. Россияның Армиязынга албан-хүлээлгезин эрттирер мурнунда, төрээн кожуунунуң организацияларынга, республиканың 1 дугаар эмнелгезинге ажылдап турган. Дайынчы ачы-хавыяазы дээш «Эрес-дидим чоруу» медаль, «Ада-чурттуң мурнунга ачы-хавыяазы дээш» орденниң II чергези-биле шаңнаткан.
Чалым Чулдум-оол Россияның Маадыры Мерген Донгактың соонда, ол атты алган Тываның үш дугаар чурттакчызы болур. Бир дугаар Маадырның Алдын Сылдызын Россияның камгалал сайыды, Армияның генералы Сергей Шойгу алган.
ТР-ниң Чазааның парлалга албаны.
Чуруктарны интернеттен алган.
«Шын» №19 2024 чылдың март 13
