Тываның кожууннарының аңгы-аңгы суурларында «Эзирлерниң уязы» губернатор төлевилели боттанып, спортчу залдар, чаашкын соонда мөөгүлер дег, туттунуп турарын билир бис.
Каа-Хем кожуунче ажыл-агыйжы сургакчылаашкынга чорааш, «Эзирлерниң уязы» деп губернатор төлевилели боттанып эгелээн Бурен-Аксы сумузунга халдып чеде бердивис. Тудуг ажылы кидин-түлүк чоруп тур. Суурнуң чагырыкчызы Орлан Момбужаевич Ондар тудугжулар-биле кады деңге балды-маска тудупкан ажылдаан тур. Ынчанмайн канчаар, «Эзирлерниң уязы» дээрге «Улусчу тудуг» болгай.
«ТР-ниң Спорт яамызы тудугнуң материалын садып берген. Одалга системазын кожуун харыылаар кылдыр дугурушкан бис.
Сумуда ниитизи-биле 500 ажыг кижи чурттап турар. Школада 75 өөреникчи, а уруглар садында 70 хире чаштар хаара туттунган.
Тудугну июньда эгелээр дээривиске, арай-ла болдунмайн барган.
Тудуг материалы манааш, саадай берген бис. Материал кээрге-ле, июльда кончуг таптыг сиген-ширбиил үезинде эгелээн деп болур. Ынчангаш күжүвүс чардыгып турар. Ынчалза-даа ажыл тура дүшпейн турар. Удавас, хар чагбаанда, тудугну дооскаш, кире бээр деп планнап турар бис. Чежемейниң-даа сиген-ширбиил үези болза, хүннүң-не 10 хире эки турачы тудугжулар чедип кээр-дир. Кымны-даа албадавайн турар бис. Чоннуң идепкейлии кижиге хей-аътты бээр-дир. Тудугжуларны суурнуң херээжен чону мурнун былаажып чемгерип турар дээр болза, хөөредиг болбас» – деп, Орлан Ондар медегледи.
Айдың ОНДАР
Буян ООРЖАКТЫҢ тырттырган чуруктары
