Өг-бүлеңерге дүшкүүрлүг байдал тыптып келзе, бажыңда энергетика үреп турар бир-ле чүүл бар деп билип алыңар. Ынчангаш энергетика үреп турар багай чүүлдерден чурттап турар оран-саваңарны арыглаңар.
Эргижирээн идик-хеп. Хөй чыл кеткен, эрги идик-хепте силерниң биеэги энергетикаңар чыглып турар. Ынчангаш оон адырылганы дээре.
Бузук аяк-шынак. Кандыг-даа тавак, аяк, паш-сава буступ азы тигленирге ону октааны дээре. Ындыг паш-савага аъш-чем чиири күзенчиг эвес болгай. Ол бузук чүгле тавакта эвес, а салым-чолуңарда база бар деп бодап алыңар.
Чок апарган кижилерниң фото-чуруктары. Ийе, кырган-аваларывыс ындыг чуруктарны эң-не көскү черге азып ап турган болгай. Ындыг-даа бол, оларны үлегерлээри албан эвес. Черле ынчаш бажыңга дириг болгаш хөделип турар энергетика турар болза эки. А чок апарган төрелдериңерниң фото-чуруктарын альбомнарга шыгжап, херек үеде ажыдып көрүп турар силер.
Херек чок статуэткалар. Бурун шагда статуэткалар, дүрзүлер бир-ле утка илередир турган. Амгы үеде олар чылдары-биле сервантылар иштинде доозунналып чыдар болгай, ооң кандыг уткалыын-даа билбес бис.
Эрги солуннар. Аңаа эрткен чылдарның календарьлары, сеткүүлдер, солуннар хамааржыр. Бир эвес кандыг-бир үндүрүлгеде ылап үнелиг чүүл бар болза, шыгжап алыңар. Бижээн болгаш парлаан сөс турум күштү эдилеп турар боор, ынчангаш долгандыр чүүлдерге салдарлыг.
Оңган үнүштер. «Бо чечек оңуп турар, эки өспес, камгалап ап болур бе?» деп боданыр силер. Аңаа дузалаар арга чок болза, оон адырылганы дээре. Орнунга чаа чечектен олуртуп алыңар. Үнүштер бодунга багай энергетика чыыр дээри чажыт эвес болгай.
Куруг шилдер. Ону курлавырлаар деп бодаваңар, куруг шилдер чуртталгаңарга болгаш бажың-балгадыңарга хоозурал эккээр.
Ынчангаш сеткилиңерге таарышпас, ол чүүлден бир-ле соок кээп турар ышкаш болза, боданмайн-даа узуткаңар. Сагыш эндевези база мындыг байдалда дузалаар.
Артык чүүлдерден кандыг-даа хараадал чокка хосталып, бажың-балгадыңарны күзелдииңер-биле аштап-арыглап туруңар, ынчан чуртталгаңар эки талаже өскерли бээрин эскериптер силер.
Чурукту интернеттен хоолгалаан.
“Шын” №22 2025 чылдың июнь 12