Красноярскының академиктиг симфониктиг оркестриниң дирижёру Михаил Мосенковтуң партитуралар номунуң таныштырылгазы болган.
ТАР-ның ССРЭ-ге каттышканындан бээр 80 чыл оюн демдеглээн байырлалдарда соңгаартан чалаткан онза аалчыларның аразында Михаил Мосенков келген. Тываның композиторларының чогааткан аялгаларының партитураларын катап тургузуп, ону кадагалап арттырары болгаш чонга нептередир талазы-биле ол дирижёрнуң киирген үлүг-хуузу улуг дээрзин тыва культурада классиктиг хөгжүмнүң үнелекчилери шупту билир.
Билдингир дирижёр Улусчу чогаадылга бажыңынга партитуралар номунуң таныштырылгазын кылып тура, дөрт чыл дургузунда Тываның эң баштайгы классиктиг хөгжүм бижиир композиторлар Владимир Тока, Ростислав Кенденбиль, Хүреш-оол Дамба, Алексей Чыргал-оолдуң партитураларын тургусканын чугаалаан. Ол улуг ажылды Президент фондузунуң грантызының деткимчези-биле боттандырган.
Михаил Мосенков боду бир дугаар тыва аялганы симфониктиг оркестрниң күүселдезинде дыңнааш, магадап ханмаан болгаш бодунга дыка чоок кылдыр хүлээп алганын чыылганнарга чугаалаан. Ооң соонда-ла тыва классиктиг хөгжүм бижиир композиторларны сонуургап, оларның чараш аялгалары Тывадан дашкаар чаңгыланыр болзун деп күзелге бүргеткеш, ону чедип алырда, партитураларны тургузары чугулазын билгеш, улуг төлевилелди дөрт чыл дургузунда бодунуң командазы-биле боттандырып шыдаан. Чүгле хөгжүмге сеткилинден бердинген, бедик мергежилдиг эш-өөрүнүң, оларның иштинде Тываның композиторларының деткимчези бо төөгүге артар улуг төлевилели боттандырар арга бергенин дирижёр катап база демдеглээн.
Болган хемчегге Тываның культура сайыды, Красноярск крайның культуразының сайыды Аркадий Зинов болгаш өскелер-даа Михаил Мосенковтуң бо ажылын бедии-биле үнелеп, Тываның профессионал хөгжүмүнүң сайзыралынга канчаар-даа аажок улуг рольду ойнаан деп демдеглээш, моон-даа соңгаар кады ажылдажылганы уламчылаарын күзээннер.
Ол хүн Михаил Мосенков “ТАР-ның ССРЭ-ге каттышканындан бээр 80 чыл ою” деп медаль-биле шаңнаткан.
Бистиң корр.
Медээни болгаш чурукту ТР-ниң Культура яамызындан алган.
“Шын” №79 2024 чылдың октябрь 16
