2023 чылда Тывага тускай шериг операциязынга маадырлыы-биле бажын салган оолдарга тураскааткан төлевилелди боттандырган.
“Тываның дайынчылары– “Кара өлүмнүң” салгалдарынга. Мөңге алдар болгаш мөңге сактыышкын!” деп төлевилел Президентиниң культурлуг эгелээшкиннер фондузунуң ачызында боттанган. База ол ышкаш төлевилел дузазы-биле “Тыва Республиканың сактыышкыннар ному” деп хөй ажыл-чорудулгалыг сайтыны ажылдап кылган. Оон аңгыда Ада-чурту дээш амы-тынын харамнанмайн, бажын салган 100 маадырны алгап-мактаан очерктерлиг номну база чырыкче үндүрген. Тываның Чазаа ук материалды үндүреринге акшаландырыышкын талазы-биле улуг дузаны чедирген. Президентиниң культурлуг эгелээшкиннер фондузунуң кураторунуң талазындан ук төлевилел эң бедик үнелелди алган.
2024 чылдың июльда ук фондунуң бир дугаар мөөрейи эгелээн. Тываның командазы бо төлевилели-биле билдириишкинни киирипкен. Чүге дизе бистиң чаныш-сыныш чок дидим дайынчыларывысты алгап-мактаар ажылды уламчылаары чугула. Бо хонуктарда ук грантылар мөөрейиниң түңнелдери билдинип келген. Ниитизи-биле чурттуң шупту регионнары 9322 билдириишкинни киирген, комиссия 1016 ажылды шилип алган, оларның аразында “Тываның оолдарының эрес-дидим чоруунга мөңге алдар!” деп төлевилел база деткимчени алган. Ук төлевилел 2023–2024 чылда бир дугаар боттанган төлевилелдиң уламчызы болуп турар.
“Бир дугаар ээлчегде Президентиниң культурлуг эгелээшкиннер фондузунуң чиңгине директорунга Роман Владимирович Кармановка база ол ышкаш фондунуң шупту эксперттеринге четтиргеним илередип тур мен. Оларның ачызында бүгү чуртта чыл санында-ла чугула ажыктыг, тускай болгаш кайгамчык төлевилелдер боттанып турар. База ол ышкаш төлевилелдиң эге чадазында белеткел ажылдарынга мени деткип турган кижилерге сеткилимниң ханызындан улуу-биле четтиргенимни илередип тур мен. Ол дээрге Тываның Баштыңы Владислав Ховалыг, Россияның Федерация Чөвүлелиниң сенатору Дина Оюн, Россияның Күрүне Думазының депутады Айдың Сарыглар, “Улусчу фронтунуң” Тывада регионалдыг салбырының удуртукчузу Саима Далчин, Тываның Өөредилге яамызы, оон аңгыда, Тываның журналистер эвилели-дир. Ам дыка улуг ажыл бисти манап турар. Төлевилелди 100 хуу боттандырар ажылга шупту күжүвүстү кызып мөөңнээр бис. Төлевилелдиң эң нарын чадазынга биске шыдаар шаа-биле дуза кадар болгаш деткиир кижилерге дыка-ла өөрүүр бис. Грантыга тиилелге дээрге улуг ажылдың чүгле чартык кезии-дир. Эң кол чүүл– шынарлыг, эки боттандырылгазы. 2025 чылда төлевилелдиң ачызында “Тываның оолдарының эрес-дидим чоруу” деп театрлар коллективтериниң аразынга республика чергелиг фестиваль-мөөрей болуп эртер. База ол ышкаш “Тыва Республиканың сактыышкын номунуң” ийи дугаар кезээн чырыкче үндүрери планнаттынган. Ынаар бажын салган 200 дайынчының дугайында очерктери кирер. Бистиң команда ук ажылга Тываның Чазааның талазындан дузаны дилеп турар. Оон аңгыда, “Тыва Республиканың сактыышкын номунуң” сайтызының айыыл чок чоруун күштелдирер ажыл чоруттунар, оон-даа өске чаа ажылдарны база немей киирер” — деп, төлевилелдиң удуртукчузу Роланда Сандан чугаалаан.
Олча СААЯ белеткээн.
Чурукту интернет четкизинден хоолгалаан.
«Шын» №100 2024 чылдың декабрь 28
