Шрифт
А А А
Фон
Ц Ц Ц Ц Ц
Изображения
Озвучка выделенного текста
Настройки
Обычная версия
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы
(видео, карты и т.д.)
Вернуть настройки по умолчанию
Настройки Обычная версия
Шрифт
А А А
Фон
Ц Ц Ц Ц Ц
Изображения
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы (видео, карты и т.д.)
Вернуть настройки по умолчанию

Бедик сүлделиг, каң кадык ээп чанып келиңер…

28 июня 2023
21

Тыва Республиканың шериг комиссариадынга тускай шериг операциязынче эки тура-биле чораан дайынчыларга шаңналдар тыпсыр езулал болган. ТШО-га эрес-дидим болгаш маадырлыг чоруу дээш Тываның эки турачыларынга ТР-ниң шериг комиссары Демир-оол Артына күрүне шаңналдарын байырлыг байдалга тывыскан.


«Эрес-дидим чорук дээш» деп медальдарны Орлан Донгакка, Александр Кууларга, Валентин Намданга, Анатолий Ондарга, Андриан Шивитке тывыскан.

«Ада-чурттуң мурнунга ачы-хавыяазы дээш» II чергениң орденниң медалынга Шораан Теспижек, «Лука Крымскийниң» медалынга Ширин Ооржак төлептиг болганнар.

Шаңналдар тыпсыр езулалга эки турачыларның дөргүл-төрелдери база киришкен. Эки турачы Анатолий Ондарның өөнүң ишти Чинчи Ондар ийи оглу-биле ачазының шаңналын ап келгеннер. Анатолий Олегович боду бо хүнде Оренбург областа шериг кезээнде ажылдап турар.

«Кажан Президент В. Путин тускай шериг операциязын чарлаптарга, өөм ээзи анаа олуруп шыдаваан, дораан баргаш, билдириишкинни киирген. Ол 2022 чылдың апрель айда ТШО-же эки тура-биле чораан. Шериг хүлээлгезиниң үезинде ол маадырлыг чоруун көргүскен.

Командири бистиң республиканың Баштыңынче Өөрүп четтириишкин бижиин чоруткан. Ол езулуг патриотчу кижи, ынчангаш чоргаарланып чоруур мен. Өөм ээзинге материалдыг чүүлдер эвес, Төрээн чурт, ат-алдар болгаш төлептиг чорук дээн ышкаш чүүлдер бирги черде…» – деп, эки турачының өөнүң ишти Чинчи Ондар чоргаарал-биле чугаалаан.
56 харлыг Орлан Донгак база ТШО-га эрткен чылын эки турачылап чорааш, эрес-дидим чоруун көргүскен дайынчыларның бирээзи. Ынчангаш ол «Эрес-дидим чорук дээш» деп медальга төлептиг. Совет Армияга шериг албанын эрттирип тургаш, снайперлеп турган дуржулгазы, бо үеде ажыын көргүскенин ол чугаалаан.

Ольга Долгай-ооловна биле Андриан Байырович Шивиттер амгы үеде Чечен Республикада шериг кезээнде тускай шериг хүлээлгезин эрттирип турар оглунуң шаңналын ап келгеннер. Шагаан-Арыгдан келген 5 ажы-төлдүг бо өг-бүлениң улуг 3 оглу шупту шериг, эрге-хоойлу албан черлеринде ажылдап чоруурлар. Хеймер оглу Тудуг техникумунуң сургуулу, бичии кызы школачы. Шаңнал алган улуг оглу Андриян Андрианович аныяандан тура бо хүнге чедир шериг херээнде ажылдап чоруур деп, авазы Ольга Долгай-ооловна тайылбырлаан: «Ол бичиизинде-ле «спецназ» болур мен дээр күзелин чедип алган. Оглувус өг-бүлелиг, ийи ажы-төлдүг төлептиг ада. Андриан ажылының аайы-биле ындыг бе, дыка шыңгыы кижи, ындыг-даа болза биче сеткилдиг, дузааргак, дуңмаларының хүндүткелдиг акызы. Бодап алган сорулгазын албан чедип алыр чаңчылдыг. Оглумга моон-даа соңгаар улуг чедиишкиннерни, каң дег кадыкшылды күзээр-дир мен. Ол ышкаш Тывавыстың шериг оолдарын аал-оранынче түрлүг-сүрлүг, бедик сүлделиг ээп чанып кээрин ие сеткилимден күзээр-дир мен».

Оолдарының шаңналдарын ап келген иелер аразында Ак-Довурактан келген Чинчи Теспижек база өөрүшкүзүн илереткен: «Бөгүн оглум Шораан Теспижекке «Ада-чурттуң мурнунга ачы-хавыяазы дээш» деп улуг шаңналды тывысты. Оглумнуң шаңналын холумга алгаш, өөрүп тур мен. Шериг албан-хүлээлгезин Иркутскыга чажыт шериг кезээнге эрттиргеш, Барыын-Хемчиктиң полиция участогунга ажылдап тургаш, тускай шериг операциязынче эки турачылап чораан. Оглум 3 ажы-төлдүг. Ам база керээ чарып алгаш, өске хоорайда шериг кезээнде ажылдап турар. Ол ам удавас ийи дугаар шаңналын база алыр. Ол дээш чоргаарланыр-дыр мен».

ТР-ниң шериг комиссары Демир-оол Артына эки турачы дайынчыларга база оларның дөргүл-төрелдеринге байырын чедирген чылыг-чымчак сөстерни илереткеш, үдеп тараан.

Алдынай СОЯН.
Начын АҢГЫР-ООЛДУҢ тырттырган чуруктары.

"Шын" №47 2023 чылдың июнь 28