Акы-дуӊма чоннарныӊ найыралы бузулбас. Кадыг-берге үелерде бот-боттарынга дузалажыр, деткижер, камгалаар деп ыдык хүлээлгени бистиӊ республиканыӊ чурттакчылары херек кырында бадыткап көргүзүп турар.
Россия дээш, бистиӊ шериглеривис дээш, бистиӊ кижилеривис дээш деп Бүгү-российжи акцияныӊ кызыгаары шагда-ла балалган. Кыска үе иштинде ук акцияга чүгле российжилер эвес, а бүгү делегейниӊ хөй-хөй чоннары киржип турар. Сагыш човап, деткимчезин илереткен кижилерниӊ бирээзи — республиканыӊ ат-сураглыг эмчизи Бежен-оол Кууларович Торуш.
«Барыын чүк чурттары сөөлгү үкраин кижи артып калырга чедир демисежир бис дээн-дир. Дыӊнаары безин коргунчуг, ынчалза-даа ол шын болуп турар. АКШ-даа, Европа-даа Киевти улаштыр деткип, чүгле өске кижилерниӊ холу-биле Россия-биле демисежир дээш, Украинаныӊ Чепсектиг күштеринге ок-чемзекти чорудуп берип-ле турар. Эвилелдежип алган барыын чурттарга Украина дээрге чүгле ажыглаар, чарыгдаар материал-дыр деп чамдык улус чөптүү-биле чугаалап турар. Ында амыр-тайбыӊ чурттакчыларны кым-даа херекке албайн турар. Оларныӊ айыыл чок чоруу дээш, чүгле бистиӊ чуртувус, бистиӊ шериглеривис тулчуп турар. Ёзулуг маадырлар олар-дыр» - деп, патриотчу эмчи сеткилин болгаш хамааты туружун илереткен.
Р.Демчик белеткээн.